LONDON, AP.- E polítikonan britániko a opta pa prolongá e stankamentu rondó di Brexit.
Despues di vários siman di stankamentu polítiko, Parlamento a vota djaweps na fabor di purba kanselá e salida di e pais for di Union Europeo, un medida ku ta evitá un separashon kaótiko kual ta programá pa sosodé riba 29 di mart.
15 dia promé ku Brexit mester sosodé i sin un akuerdo si separashon aprobá, Kámara di Komun a vota 413-202 na fabor pa pidi Union Europeo pa posponé e salida di Gran Bretaña te 30 di yüni.
E votamentu ta duna promé minister Theresa May masha tiki espasio pa maniobrá, pero ainda e ta humiante pa un lider ku a pasa dos aña bisando e británikonan pa bandoná e bloke di UE riba 29 di mart.
UE tin poder pa aprobá òf rechasá e ekstenshon i a duna indikashon ku lo permití pa posponé solamente si Gran Bretaña aprobá e akuerdo di separashon òf realisá un kambio fundamental pa ku e pais su posishon relashoná ku Brexit. Den un ironia históriko, kasi tres aña despues ku Gran Bretaña a vota pa sali di Union Europeo, atrobe e pais su futuro ta den man di e bloke.
Komishon Europeo a bisa ku e bloke lo konsiderá tur solisitut “tumando kualkier motibu i durashon di e posibel ekstenshon na kuenta”.
May a wòrdu obligá pa konsiderá pa posponé Brexit despues ku e legisladornan a rechasá su akuerdo di separashon dos biaha.
