LONDRES (AFP).- Huristanan di gobièrnu britániko enkargá ku temanan di igualdat, a atvertí ku den Reino Uní muhénan trans no mester por usa bañonan di hende muhé, despues ku Korte Supremo a disidí pa basa e definishon legal di un muhé riba sekso biológiko.
Di akuerdo ku e veredikto, ku a provoká gran preokupashon entre personanan transgénero, e Komishon pa Igualdat i Derechinan Humano (EHRC, pa abreviashon na ingles) a stipulá ku pa lei “Un muhé transgénero ta un hòmber biológiko” i ku “un hòmber transgénero ta un muhe biológiko”.
Pa e motibu ei, “e muhénan transgénero (hòmbernan biológiko) no por ta outorisá pa usa tualètnan reservá pa hende muhé” den pakus, restorant òf hospitalnan, esei di akuerdo ku lei.
Esei ta konta di mes manera pa hòmbernan transgénero pa uso di tualèt i espasionan pa hende hòmber.
Pero, “e personanan transgénero no mester por haña nan den un situashon ku no tin tualèt na nan disposishon”, segun e Komishon.
“Esaki ta konsekuensia lógiko dje desishon” di Korte Supremo, segun Pat McFadden, un funshonario haltu di gobièrnu. McFadden a splika ku di ningun manera lo tin”polisnan di tualèt” ku pa vigilá kumplimentu ku lei.
Den skolnan, “alumnonan ku ta identifiká nan mes komo mucha muhé transgénero (mucha hòmber biológiko) no por usa tualèt òf kamber femenino pa kambia paña” ni e mucha hòmber trans e tualèt i kamber reservá pa mucha hòmber”, segun e komishon.
E promé minister britániko, Keir Starmer, a bisa ku e veredikto di Korte Supremo ta trese klaridat riba e asuntu, apesar ku e mes den 2022 a bisa ku “muhénan transgénero ta hende muhé”.
