E hues Fernando Rodriguez, designá pa e propio presidente Donald Trump, ta blòkia deportashonnan na Texas.
WASHINGTON (AFP).- Un hues federal di Texas a diktaminá ku ta “ilegal” e uzo di parti presidente Donald Trump di un lei di siglo XVIII pa deportá supuesto miembronan di gèngnan venezolano.
E hues Fernando Rodriguez, designá pa e propio Trump, a blòkia kualke deportashon for di su distrito zùit di Texas di supuesto miembronan dje gèng “Tren de Aragua” ku gobièrnu hasiendo uzo di e lei di enemigunan estranhero di 1798.
Korte Supremo i vários tribunal di distritonan a paralisá temporalmente e ekspulshonnan ku ta tumando lugá dor di uso e lei aki. Segun korte, e lei falta e garantianan di proseso, pero Rodriguez ta e promé hues ku ta konsiderá ku su uzo te asta ta ilegal.
Dia 15 di mart Trump a kuminsá hasi uso dje lei pa manda supuesto miembronan di gèngnan venezolano pa un mega prizòn di El Salvador, ku a presta su mes pa sera esnan deportá a kambio di seis mion dollar, segun White House.
Te ku e momentu ei a usa e lei solamente den tempunan di guera, spesialmente pa sera siudadanonan norteamerikano di orígen hapones durante dje di dos guera mundial. Trump ta bisa ku “Tren de Aragua” ta envolví den ”akshonnan hostil” i “ta menasá ku un invashon di kriminalnan kontra dje teritorio di Merka”. Segun White House, e “régimen hostil” di e mandatario venezolano Nicolas Maduro ta dirigí e gèng.
“E presidente no por deklará riba su mes ku un nashon òf un gobièrnu estranhero a menasá òf a traha riba un invashon di Merka”, segun e hues Fernando Rodriguez ta konkluí den su veredikto di 36 página.
“Pa permití ku e presidente di forma unilateral ta definí e kondishonnan ku por tin relashon ku e lei i despues deklará riba su mes ku e kondishonnan ei ta eksistí, lo eliminá tur e limitashonnan dje outoridat di poder ehekutivo”, segun e hues.
“E invokashon dje lei di parti dje presidente “ta superá e alkanse legal i komo resultado ta ilegal”, segun e hues a bisa.
“Gobièrnu no tin e outoridat legal, usando lei di enemigunan estranhero, “pa detené estranheronan venezolano, trasladá nan den Merka òf ekspulsá nan di e pais”, segun e veredikto.
