WILLEMSTAD.- Frakshon di MAN-PIN den Parlamento di Kòrsou a entregá ofisialmente e proposishon di lei di pa verlòf pa tata, i ku esaki e ta kla pa tratamentu den Parlamento. Ku e proposishon aki, MAN-PIN ke introdusí un derechi legal pa tatanan tambe haña verlòf paga despues di nasimentu di nan yu.
E inisiativa ta representá un paso importante den fortalesé famia, igualdat entre hende hòmber i muhé, i bienestar di mucha for di e promé dianan di bida, pero tambe un avanse den derechinan laboral. Aktualmente, hopi tata na Kòrsou no tin derechi legal pa keda kas despues di nasementu di nan yu, i hopi biaha nan mester usa dia di vakashon òf sigui traha den un momentu hopi importante pa e famia.
Ku e lei aki, MAN-PIN kier trese kambio den e situashon aki i pone Kòrsou mas alinea ku desaroyonan moderno laboral i humano. E lei ta proponé pa empleadonan maskulino tin derecho riba verlòf pagá, a base di e kantidat di ora ku e empleado ta traha pa siman.
E proposishon lei ta tene kuenta tambe ku sostenibilidat finansiero di sistema di seguro sosial i ku realidat di merkado laboral na Kòrsou. Segun frakshon MAN-PIN, e inisiativa no solamente ta trata di un benefisio laboral, sino di un invershon den desaroyo humano, salú mental, stabilidat familiar i futuro di nos muchanan.
Frakshon MAN-PIN ta spera ku Parlamento lo trata e lei ku e seriedat ku e meresé i ku Kòrsou finalmente lo duna rekonosimentu legal na e ròl importante di tata den famia. “Un famia fuerte ta kuminsá ku presensia, ku amor i ku responsabilidat kompartí. Verlòf pa tata no ta un luho, pero un paso nesesario pa un sosiedat mas humano i mas hustu. MAN-PIN ta sigui komprometé ku polítika sosial progresivo inovativo ku realmente ta pone e hende, famia i dignidat humano na sentro di desaroyo di Kòrsou.”
