WASHINGTON (AFP).- Miónes di hende muhé kasá i personanan transgenero di Merka lo por tin problema pa vota si aprobá un lei promové pa e presidente Donald Trump. E lei aktualmente ta pa debate den Senado.
E proyekto di lei, aprobá kaba den House of Representatives, ta eksigí pa votadónan proba nan siudadania norteamerikano ku sertifikado di nasementu òf pasport na momento di inskribí den e registro elektoral, i ku na momento di vota nan presentá un dokumento di identidat bálido.
Kontrario na otro paisnan, Merka no ta saka un dokumento nashonal di identidat, i komo tal ta aseptá un reibeweis i te hasta un tarheta di studiante.
E teksto di “SAVE America Act” (Lei di Elegibilidat di Elektornan Merikano), ta stipulá ku e personanan kende nan nòmber no ta koinsidí den e dokumentashon presentá mester tin dokumentonan adishonal, manera un sertifikado di kasamentu òf un sentensia di divorsio, pa hustifiká e kambio. Pero segun e Sentro Brennan pa Hustisia di New York University, “mas ku 21 mion di norteamerikano no tin akseso dirèkt na e dokumentonan ei” i “kasi mitar di norteamerikanonan no tin pasport”. Komo tal, e votadónan mas afektá den kaso ku aprobá e lei SAVE America lo ta “hende muhé, personanan transgenero i personanan ku entrada abou, kendenan no por paga pa un pasport i kendenan no ta biaha”, segun Rick Hasen, profesor di lei elektoral di California University di Los Angeles (UCLA).
Kambio di nòmber
Letitia Harmon, direktor di investigashon den Florida Rosing, un organisashon ku ta traha pa hustisia sosial ku sede na Florida, a bisa na AFP ku e tabata kasá i despues a divorsiá den estado di Washington. “E problema ta ku mi no sa kua nòmber ta figurá den e registro elektoral di Florida. “Mi no sa si nan tin mi fam di soltero òf esun di kasá”.
Segun Harmon ku probablemente e mester solisitá su sentensia di divorsio, un trámite kostoso ku ta tuma hopi tempu.
White House ta argumentá ku e lei SAVE America ta yuda pa evitá froude elektoral, ounke e lei aktual ya ta prohibí estranheronan di vota. Pa loke ta hende muhé kasá kendenan a kambia di fam “simplemente nan mester sigui e prosedimentunan di nan estado pa aktualisá e dokumentonan”, segun Karoline Leavitt, bosero di gobièrnu norteamerikano.
Segun Pew Research Center, den 2024 un kantidat di 52% di hòmbernan inskribí den e sistema elektoral di Merka tabata na fabor di e republikanonan, kontra di 44% di hende muhé.
