Lei i sanshon skèrpi pa protehá konsumidó

WILLEMSTAD.- Grupo di akshon KAS ta pidi pa bini ku leinan i sanshonnan mas skèrpi pa protehá konsumidó kontra dunamentu di servisio kontra pago na un nivel pésimo i kontra di bendementu di produktonan ku no ta kumpli ku normanan i spesifikashon di kalidat internashonal, spesialmente pa nos sistema di elektrisidat i tambe kontra e oportunidat pa bende Pueblo tur sorto di artefaktonan i materialnan importá i lokal di kalidat inferior i na preisnan karu.

Humphrey Davelaar di grupo di akshon Kas ta bisa ku un pais kaminda su florin kada dia ta pèrdè balor di kompra mester ta dispone di leinan i sanshonnan skèrpi ku ta protehá su siudadanonan kontra e tipo di práktikanan di bende gato na saku i bira riku riba kustia di pueblo i subi inflashon den komunidat i oumentá pobresa mas i mas.

Poko ehèmpel aki bou di aña aden aña afó ku ta sosodé na Kòrsou:

Si den un luna awa shushi basha for di bo kranchi di kas, ora fin di luna yega bo tin di paga bo resibu  manera ta awa limpi bo a haña i si bo no paga e resibu di e luna ei Aqualectra ta paga pa laga kòrta bo awa. Un Pueblo indefenso.

TDS ta na bo un kalidat inferior kaminda kanalnan ta fris sin miserikòrdia i fin di luna bo tin di paga bo resibu na tempu òf nan ta paga pa laga kòrta bo kabel tv.

Bo ta paga tur luna pa bo internèt i tin dia e ta kai afó òf bo ta risibí ménos MB ku bo ta paga pe i si bo no paga bo resibu na tempu nan ta paga pa kòrta bo señal.

Kalidat di produktonan importá e.o paña, aparato doméstiko elektróniko materialnan di konstrukshon ku hopi keho funda di komunidat, e.o kalidat i preis.

Mester bini urgente un lei mas skèrpi i mara na sanshonnan pisa pa protehá nos komunidat den sentido di e pòtmòni di famia i tambe protehá nos medio ambiente di artefaktonan ku promé ku nan tempu di durashon yega, ta para bira sushi i porkeria tur kaminda di dùmp.

Grupo KAS ta pidi Gobièrnu i Parlamento pa bin ku leinan skèrpi i sanshon pisa pa duna mas protekshon na konsumidó i mas protekshon na nos medio ambiente i salubridat.

SHARE

LEAVE A REPLY