Saka algu positivo for di e lèsnan na Oustralia
WILLEMSTAD.- Den e weganan di fogeo den e torneo na Oustralia kaminda nos a sali último, nos a siña algun realidat. Na promé lugá, ku nos tin diferente hungadó ku no ta na nivel di mundial, sigur mirando nos tres kontrinkantenan ku ta pertenesé na tòp di Europa, Sur Amerika i Afrika. E di dos lès ta ku den tòpspòrt loyalidat nunka por bai a kosto di kalidat.
Awor nos ta pará ku dos pia riba suela. Kiko awor? Lanta mester lanta ariba, stòf karson i sigui, pasó mester hunga un Mundial di futbòl i bista di hinter mundu ta riba nos. Ya kaba hopi a kuminsá bisa ku nos no tin nada di buska na Mundial. Nos lo tin ku prueba lo kontrali. Nos dos weganan na Oustralia, ku eksepshon di algun pida wega, tabata bou di nivel i nos a laga mal impreshon atras. Si e promé kontra China nos por a bisa ku nos tabata kansá di e biahe largu, apesar ku esei ta konta pa Kamerun tambe ku a sali na di dos puesto, nos a haña oportunidat pa sosegá pa di dos wega i a bolbe basha awa.
Mester trese Obispo i St. Jago
No ta kulpa di e defensa so, pero esei tabata e punto mas débil. Nos sentro di defensa a pifia hopi. Esei tin di haber ku e nivel tambe. Pa bo presta tòp, bo mester di hungadó tòp. Nos tin tres sentral di nivel hopi haltu, Obispo, St. Jago i Bazoer. Aunke Bazoer ta biniendo bèk di leshon largu di luna. El a kuminsá hunga atrobe i lo tei pa Mundial si kos sigui asina. Pa e nos no mester preokupá, pasobra e tin nivel haltu i a yega di wòrdu skohé komo mihó futbolista di Eredivisie.
Obispo ta kasi kampion di Ulanda ku PSV i ta hañando hopi mas oportunidat ku den pasado. St. Jago ta den e buèlta di kampion na Bèlgika, kaminda e mihó ekiponan di e temporada ta lucha pa bira kampion. Ta inkreibel ku ainda FFK no a pone preshon pa invit’é, kaminda el a solisitá públikamente pa bin hunga pa Kòrsou. Esei ta nifiká dos kos: Of e direktiva di FFK no sa ken Tommy St. Jago ta, òf nan ta laga e kuerpo tékniko so disidí, kaminda ta interes di Kòrsou ta den wega.
Ku Obispo, Bazoer i St. Jago, tin tres defensa sentral ku bo por presentá tur kaminda kuné, paso tur tres ta militá den tòp. Pero si ke sigui premia loyalidat, anto nos no mester pretendé ku nos ta praktiká tòpspòrt. Esnan ku a okupá e puestonan ei na Oustralia a hasi nan bèst i nan mag bai Mundial, pasó nan a yuda nos yega aki, pero no ta asina si ku na Mundial nan mester hunga promé ku hungadó ku ta hunga muchu mas haltu ku nan.
Hopi kos pa drecha
Lo ta inhustu pa kulpa un òf mas hungadó. Nos wega ku ekspeshon di algun minüt tabata bou di nivel, sin struktura. Tin hungadó si, pero mester stòp di komplasé si ta presta nos ke presta. Room ta nos úniko kiper di nivel haltu. Ku e tres sentralnan ariba menshoná, ku e halfnan Brenet òf Sambo riba rèks i Floranus òf Fonville riba e otro ala, nos lo tin un defensa di riba nivel 1 so. Leo ku Juninho i Tahith por karga un bolante. Sontje mester hunga poko mas i e tambe lo ta riba nivel. Ku Locadia i Kuwas, nos tin delantero ku konosé gol. Esaki mester ta e núkleo pa Mundial.
Riba banki, Margaritha, Noslin i Comenencia ta kreseindo na nivel den nan klup. Margaritha a promové pa e divishon mas haltu na Bèlgika i Noslin ta hunga Eredivisie tur siman. Sobra, ku tur rèspèt, no ta hunga riba nivel pa kometí den e grupo fuerte ku nos a kai aden. Tur ta hasi nan bèst si, pero den tòpspòrt esei so no ta sufisiente. Mi ta sospechá ku Advocaat por a kalkulá lokual ta bai pasa. Nos tin ku keda ku Rutten, paso el a drenta den un situashon ku e sa ku lo bai bira difísil i tòg a tuma e tarea for di esnan ku no tei mas. Nos tin ku keda para tras di ‘Pantera Negra’ paso ta nan ta nos Kòrsou stima na mundial.
Pa: Eldon “Peppie” Sulvaran.
