WILLEMSTAD – Durante e rueda di prensa ayera di Legends Football Tournament, diferente leyenda di futbòl mundial a trese dilanti ku nan ta gusta ku Kòrsou. Mayoria di nan a bisa ku nan ta risibí tremendo trato serka organisadónan, i ku pueblo di Kòrsou a mustra nan tremendo amabilidat.
Esaki ta algu ku e leyendanan di e ekiponan di Colombia, Spaña, Italia, Portugal, Hulanda, Argentina a bisa durante e rueda di prensa ku a tuma lugá na Corendon.
Mas importante ainda ta ku vários di e leyendanan a pone énfasis riba e logro históriko di Kòrsou. Kual ta e klasifikashon pa Mundial 2026. Segun nan, esaki ta algu grandi i ku tur yu di Kòrsou tin ku sinti nan mes orguyoso di dje.
Nan a bisa ku e hungadónan mester disfrutá di e momentu, i gosa ku nan tabatin e honor di klasifiká un isla chikitu pa e Mundial.
Miéntras pa loke ta trata e Legends Football Torunament mes tur e ekiponan a bisa ku nan ta kla pa duna bon bataya, i lo brinda un bon espektákulo na tur presente.
E delegashon di Kòrsou tambe ta kla pa duna bon papel, i ta pidi henter pueblo di Kòrsou pa bin apoyá nan i gosa di e tremendo torneo di leyenda aki.
