JERUZALEM (AFP).- Israel a anunsiá di a “eliminá” e lider di Hamás, Yahya Sinwar, durante di un operashon den Gaza, den loke por bira un gòlpi desisivo kontra dje movementu islamita despues di un aña di guera den e teritorio palestino.
“E asesinato den masa Yahya Sinwar, responsabel di e masakre i atrosidatnan di 7 di òktober, a keda eliminá”, segun e minister israelí di Relashonnan Eksterior, Israel Katz, den un komunikado mandá na prensa.
Un ratu despues ehérsito a konfirmá ku “despues di un búskeda di un aña, ayera (djárason), 16 di òktober di 2024, sòldánan di ehérsito israelí a eliminá Yahya Sinwar, lider dje organisashon terorista Hamas durante di un operashon den zùit di Gaza”.
E promé minister di Israel, Benmjamin Netanyahu, a afirmá ku “maldat a sufri un gòlpi duru”, pero ku “e guera ainda no a kaba”.
E presidente israelí, Isaac Herzog, a urgi di su parti pa lansa un akshon pa liberá e rehennan retené den Gaza.
“Awor, mas ku nunka, nos mester aktua ku tur medio posibel pa trese bèk e 101 rehennan ku ainda ta retené bou di kondishonnan horibel serka e teroristanan di Hamas den Gaza”, segun Herzog a bisa.
Sinward, figura radikal ku semper ta den sombra, ta keda konsiderá komo un dje serebronan dje mortal atake lansá dia 7 di òktober di 2023 di parti di Hamas den teritorio israelí, loke a sòru pa e guera den Gaza.
Di 61 aña i hefe for di 2017 dje movementu islamita palestino den Gaza, el a keda nombrá komo hefe polítiko di Hamas na kuminsamentu di ougùstùs, despues di morto di Ismail Haniyen, asesiná na Tehran dia 31 di yüli den un atentado atribuí na Israel.
Sinwar, kende su nòmber tabata figurá riba e lista merikano di “teroristanan internashonal”, tabata opheto di vários intento di asesinato.
E presidente republikano di Kámara di Representantenan di Merka a aploudí “e morto dje lider di Hamas”, ku el a kalifiká di ta “un persona baho i repugnante”, i a konsiderá ku su morto ta un alivio pa e pueblo di Israel.
E anunsio di su morto a tuma lugá algun siman despues ku Israel a asesiná e lider di Hezbolá, Hasánm Nasralá, den un bombardeo den Libanon, kaminda ehérsito israelí dia 23 di sèptèmber a lansa un ofensiva aéreo, siguí un siman despues pa operashonnan na tera.
Den e último lunanan a asesiná otro komandantenan di Hezbolá, un grupo apoyá pa Iran.
Israel algun luna pasá a bisa di a mata Mohammed Deif, e hefe militar di Hamas, ounke e movementu islamita palestino no a konfirmá esei.
Deif a keda akusá di a planifiká e atake dia 7 di òktober huntu ku Sinwar.
