Vehíkulonan militar israelí ta move riba e kaminda na parti sùit di Líbano pegá ku frontera ku Israel
HERUSALEM, INDEFINI, AFP.- E lider opositor prinsipal di Israel, Yair Lapid, a akusá gobièrnu djaweps di hinka e pais den un “desaster di seguridat” debí na e skarsedat di sòldatnan.
“IDF ya a surpasá nan límite. Gobièrnu ta lagando ehérsito heridá riba kampo di bataya”, asina Lapid a bisa den un deklarashon na televishon. Un dia promé e hefe militar, teniente general Eyal Zamir tambe a emití un atvertensia na e gabinete di seguridat, segun indikashon di informenan di medionan israelí.
“Gobièrnu ta hibando ehérsito den un guera di sin un strategia, sin e medionan nesesario i ku un kantidat demasiado abou di sòldat”, asina Lapid a bisa.
Informenan di medionan a sita Zamir informando gabinete di seguridat ku “Forsanan di Defensa di Israel ta serka di kolèps”.
E bosero militar di Forsanan di Defensa di Israel a bisa ku “mester di mas sòldat” den vários frente, spesialmente na Líbano.
Lapid a pidi pa rekluta hòmbernan di e komunidat ultra-òrtodòks Haredi. Pero e hòmbernan aki a haña un disposishon di servisio militar, kual ta obligatorio na Israel, bou di un lei establesé na aña 1948 desde kreashon di Israel.
