WILLEMSTAD.- Ayera a bira konosí ku e lider opositor di Venezuela Edmundo González Urrutia (75) pa un (1) luna largu a haña refugio den embahada hulandes na Caracas. E tabata den tur sekresia den e embahada. Na momentu ku Edmundo González ta riba kaminda pa Spaña unda el a pidi asilo polítiko, e minister di asuntunan di eksterior hulandes minister Caspar Veldkamp a duna esaki konosí na Tweede kamer. Manera ta konosí Edmundo González ta ser mira e ganadó di elekshonnan presidensial na Venezuela den luna di yüli último. Pero ku tin gritunan fuerte ku e aktual presidente sr. Nicolás Maduro lo mester a kometé “froude” i asina p’e keda na poder. For di fin di yüli último no a mira e lider di oposishon mas den públiko, miéntras ku djamars último Venezuela a saka un órden di detenshon kontra di Edmundo González. Djasabra a bira konosí ku el a sali for di Venezuela i a haña asilo polítiko na Spaña. Segun e visepresidente venezolano ku último dianan Edmundo González tabata den embahada spañó i ku e gobièrnu venezolano mes lo a koperá pa bandoná e pais.
Veldkamp a deklará na prensa ku tabata un eksepshon ku embahada hulandes na Caracas a duna alohamentu na e lider di opositor. Fin di luna di yüli, djis despues di elekshon na Venezuela, a drenta petishon insistente di González p’e por haña “refugio” den embahada hulandes na Caracas. “Den e kaso eksepshonal aki, mi kier a dun’é”, Veldkamp a bisa. González tabatin miedu di persekushon polítiko. Veldkamp a bisa ku no sa dikon e lider di oposishon spesífikamente a bati na porta di Hulanda. Pero Hulanda si tin un “aktitut aktivo pa ku e proseso demokrátiko”, e minister hulandes a bisa. Via di nos islanan di den Reino, ku ta bisiña di Venezuela, Veldkamp a pone su desishon den balansa.
E islanan Aruba, Bonaire i Kòrsou ta keda hopi serka di e kosta di Venezuela. Pa hopi aña nan tin molèster di e situashon di Venezuela. Dor di represhon, dor di e régimen, pero tambe dor di e maneho ekonómiko malu”. Den luna di yüli Veldkamp tabatin kontakto ku e promé ministernan di Aruba i Kòrsou. “Nan a karga e desishon aki”.
Ora González a bisa di ke sali for di Venezuela, Veldkamp a papia kuné. “Mi tabata ke sa kiko ta su konsiderashonnan. “González ta kere di por duna un kontribushon na oposishon estando den eksterior.
