RAMALA, JORDANIA, AP.- Presidente merikano Donald Trump a invitá presidente palestino Mahmud Abbas djabièrnè pa un bishita na Kas Blanku. Asina un bosero di Abbas a bisa.
E bosero Nabil Abu Rdeneh a bisa ku Abbas a “risibí un yamada importante” i di Trump kaminda el a wòrdu invitá pa Kas Blanku i ku Abbas lo bishitá esaki “pronto”.
E sekretario di prensa pa Kas Blanku, Sean Spicer, a konfirmá e invitashon aki.
“Nos ta kla pa kombersá ku presidente Trump i e gobièrnu israelí pa reanudá negosiashonnan”, segun Abu Rdeneh. “Si e israelínan ta kla, e presidente Abbas lo komprometé ku un akuerdo pasífiko ku presidente Trump”.
Abu Rdeneh a agregá ku presidente Trump ta un persona honesto i balente, ku kier un akuerdo, un simpel akuerdo”.
No tabatin komentario inmediato di e gobièrnu israelí.
E último ròndu di kòmbersashon di pas media pa Merka a wòrdu suspendé na aña 2014.
E yamada di djabièrnè tabata e promé entre Trump i Abbas desde Trump su inougurashon komo presidente.
Trump ta impopular entre palestinonan debí na gestonan ku a kibra e posishonnan establesé pa su predesesornan den Kas Blanku i pa adoptá e posishonnan mas faborabel pa gobièrnu di Israel.
