Lider supremo nobo di Irán ta primintí vengansa
TEHERAN, Iran (AFP).- E ayatolá Mojtaba Jamenei a primintí vengansa den su promé mensahe komo guia supremo nobo di Iran i a pidi pa tene será e pasashi stratégiko di Ormuz komo medida di preshon den e guera kontra di Merka i Israel. E guera a paralisá e kanal di Ormuz i, konsekuentemente, un parti esensial di tráfiko mundial hidrokarburo (koolwaterstof) ku ta pasa dor dje region, loke a provoká e opstákulo di mas grandi di suministro di petrolio di historia, segun atvertensia di Agensia Internashonal di Energia (AIE).
“Definitivamente mester usa e triki di blokeo dje kanal di Ormuz”, segun Jamenei den un komunikado lesá na televishon estatal, ku no a aklará e spekulashonnan riba su estado di salú. E no a aparesé den públiko for di inisio dje konflikto i tin reportenan ku ta bisa ku e ta heridá.
E Guardiannan di Revolushon poko despues a anunsiá ku, komo reakshon riba e “ordunan” di Jamenei, lo nan propiná gòlpinan duru na su enemigu i lo mantené e “strategia di sera e kanal di Ormuz”.
E lider nobo a keda designá djadumingu pa sustituí su tata, Ali Jamenei, kende a muri na komienso dje atakenan israelí-merikano riba Iran dia 28 di febrüari.
Atakenan ta sigui: E Komando Sentral di Merka a duna di konosé ku su forsanan a ataká den kareda di 6.000 ophetivo iraní for di kuminsamentu dje guera, inkluso 90 barku. Na Teheran e poblashon ta biba ku miedu debí na bombardeonan i un habitante a duna di konosé ku e estado sikológiko di hopi hende ta hopi malu pa motibu ku nan a pensa ku lo no tin guera. No ménos ku 3.2 mion iraní mester a bandoná nan kas i bai otro partinan dje pais pa motibu dje bombardeo.
Den su mensahe, Jamenei a hasi un yamada na paisnan di Golfo pa sera e basenan militar di Merka, ku ta metanan di atakenan iraní den represaya kontra di Israel i Merka. “Mi ta rekomendá pa sera e basenan ei mas lihé posibel. Bosnan mester a tuma nota kaba ku e deklarashon di ku Merka ta garantisá seguridat i pas no ta nada otro sino un mentira”, segun el a trese dilanti.
Paisnan di Golfo a redusí e produkshon petrolero ku por lo ménos 10 mion barí pa dia debí na e blokeo dje kanal di Ormuz.
