Dia 16 di novèmber awor lo tin un evento titulá UnBox. E evento aki lo konta ku Liesje Obispo huntu ku diferente otro persona/artista/influencernan den komunidat manera Lady Lava, Nello, Hóben ku Eskoho. Tema di e evento spesial aki ta “Seksualidat i trouma”. E evento ta tuma lugá na Teatro Luna Blou i pa por tuma parti mester manda un mensahe na 5999 6726615. Ta un evento grátis.
UnBox ta tuma lugá na Teatro Luna Blou ku 2 presentashon; 3 or pa 5 or di atardi i 6 or pa 9 or di anochi.
Liesje Obispo i Sharifa Janga a duna un splikashon di e evento. Sharifa ta forma parti di e fundashon Achmea Slachtoffer en Samenleving. Segun splikashon di Sharifa, e ta un di e sostennan di mas grandi di Liesje. Unbox ta un baul ku nos tin den kashi skondí, ku nunka sea komunidat, religion, polítika, famia no a permití nos habrié i papia abiertamente di kosnan ku ta trouma. Liesje a bin ku un konsepto pa enkurashá tur hende pasobra ta kosnan ku por pasa tur hende i p’esei mester UnBox bo trouma. E persona riba su mes no tin falta di loke a pas’é i ku a kousa trouma. Niun hende ta kana eifó sperando ku algu ta pasa. ‘Pero ta bin aserka ku nos no a keda eduká den un kultura ku ora algu pasa nos, pa buska yudansa. Nos a keda eduká pa keda ketu pasobra ta un bèrgwensa. I tur e kosnan ei ta den e box/kaha ku dado momentu ta yena i ta eksplotá. I p’esei nan mes ta bai UnBox nan troumanan”.
Propio eksperensia
Pa Liesje no ta trata di un idea pero un proseso di sanashon, ku e mes a pasa aden, tempu e tabatin 12 aña. Pa kasi 18 aña Liesje ta karga su doló i pa último 3 aña ku e ta grabando e dokumental, el a UnBox su mes, saka su doló, permití guianan profeshonal den su bida, pa e aseptá, adaptá i pa e bringa pa e biba na un manera sano pa ku komunidat. UnBox ta un nòmber ku tur hende por sinti nan mes yamá na dje. Tentamentu, violensia doméstiko, maltrato, tur tin di aber ku tabú i doló ku un hende por afiliá su mes na dje. Liesje a bisa ku su historia a bai rònt Ulanda, pasobra tabata e violashon seksual di mas grandi ku a konosé na Rotterdam, ku el a pasa aden. Liesje komo víktima a haña e yudansa profeshonal di instansianan kaminda e por a profundisá den su doló. Eseinan Liesje a trese den e dokumental i a spanta ora den un aña el a haña mas di 3 mil víktima ku a konta di nan doló, rekonosé nan mes den e dokumental. Liesje a tuma un aña di su tempu pa apsorbé kosnan positivo ku a bin su direkshon, pone kosnan negativo un banda, pa e logra. E sentimentu di paden a yud’é tin e kurashi pa awor para kara pa e tópiko, den e kampaña troumátiko i emoshonal aki. Esun ku bin e evento di UnBox lo rekonosé kosnan ku nunka a pensa ku lo tabata un trouma i doló.
E momentu
Ku momentu Liesje a sali afó i papia. E ta konta kon e tabata den un entrevista; un entrevista komun i koriente riba su shownan i bailamentu pero einan el a haña e pregunta kon su hubentut tabata, ken tabata su promé frei etc. Tabata preguntanan ku el a guli manda abou pasobra e no tin kontestá pa nan. A krea un buraku den dje ku el a tene duru será pa hopi aña. El a hañ’é konfrontá ku algun palabra masha simpel ku un hende por kontestá, pero e no tabata por.
Un protekshon pa por sigui biba
Maske Liesje a pasa den su trouma tantu aña pasá, e mucha chikí a keda den dje. Liesje a krea un sistema di protekshon rònt di dje, un fòrti di protekshon i esei ta e personahe ku hende konosé. Pero den bida diario hende no ta puntra kon a bai, si e tin doló òf no. Liesje tabata den e gremio pa e keda den e personahe ku el a krea, pa e skonde loke el a pasa aden. Tabata un manera pa e biba den komunidat. Si e no mester papia di dje, e lo no a sinti ku e lo a strob’é pa biba te ora el a haña e preguntanan klave, preguntanan ku sikólogonan ta puntra pa bai bèk i papia di dje viktorioso. Esei tabata e momentu pa Liesje pa e sa ku algu ta robes i el a buska yudansa. I Liesje lo sigui mester di guia, no sa te ki dia pero e ta un muhé fuerte mentalmente i su bos lo toka kualke hende hóben i grandi ku tin kosnan wanta pa añanan.
Kiko por spera
UnBox ta un evento spesial ku músiko, artistanan lokal, oradornan. Ta trata di hendenan konosí na Kòrsou den komunidat. El a pone den un teatro pasobra loke nan trese dilanti den tur forma ku e ta e tin di aber ku e tema, e trouma, e tabú di UnBox. E ta pa hóben for di 14 aña i e ta un programa di henter dia. Si tin skol interesá por tuma kontakto ku e number di telefòn i bisa kua orario ke bin. A tene mainta pa skolnan asistí i atardi pa mayor i yunan. Tin bia e mayor ta pasa over loke el a pasa aden i unabes e mayor tuma e inisiativa pa siña mas tantu e komo e yu ta krese. Esaki pasobra no ta kustumber di ta na mesa sintá i papia di e temanan aki, i p’esei no ta krea un base di konfiansa tampoko ku e yu pa e por yega i papia fásil kiko a pas’e. UnBox ta kompletamente grátis pasobra Ulanda a spònser tur kos pa Kòrsou i e lo habri kaminda, krea táktikanan pa yuda mayornan por konektá mas ku nan yunan, pa e muchanan sinti ku tin límite pasobra e malechor hopi bia ta mas serka di e mucha.
Te kon leu lo bai
Liesje a splika ku durante di e evento spesial tur pregunta ta bon biní. I p’esei nan tin profeshonalnan presente manera sikólogo i trahadónan sosial pa atendé kisas ku emoshonnan ku ta bin ariba. Liesje a bisa ku pe ta algu emoshonal kaba te kaminda el a yega aki. E hende mester tin kurashi pa papia pero mester bring’é. Den Liesje su kaso, te ainda e ta bringando. Den e 2 aña ku e ta den e prosedura ainda e no ta kompleto afó. Miéntras e ta papia ku hendenan den mesun direkshon e ta siña mira e otro parti di e doló i aserká e doló di otro manera. I no ta bai pa kompetí kua doló ta mas ku otro pero e ta algu di humano pa humano.
Krea un espasio safe
Sharifa a bisa ku nan ke krea un espasio safe. E fundashon ta na Ulanda i kisas den futuro nan por bin ku base na Kòrsou. I ta importante pa krea komunidat pa bin huntu pa por papia di e susesonan sin ku nan ta hasi doló. Sharifa a bisa ku bida tin hopi kos i tin bia hende ta pasa den kos pasobra kisas ta e persona ei lo mester buska e guia. Hende lo sigui hasi fout i p’esei tin e guianan profeshonal pa yuda i duna e yudansa.
Esun yuda e otro
Te ainda apesar ku ta papia hopi tin hopi hende wanta i ku bèrgwensa. Liesje a bisa ku un tin di stap otro pa e otro por sigui i asina kibra ku e bèrgwensa. Esun ku a pasa aden i ku a haña yudansa tin di duna man na esun ku tin e nesesidat i no sinta tende i husga otro. Sharifa a bisa ku Kòrsou ta un pais ku tin diferente hende di otro pais ta meskla awe. I kada un ta bin ku su pensamentu. Sharifa a bisa ku mester krea e konsientisashon ku nos ta yuda otro, krea un komunidat. Tin hende ta pasa den kos robes i malu i no ta kòrda òf no ke kòrda. E hende su mente por blòkia tu kos pero e kurpa ta keda warda, warda i warda tur loke bo ta sinti. I dado momentu algu masha simpel ta saka e doló bon skondí ei. Algu masha simpel por pasa i e hende su trouma ta sali ku e mes no por komprondé. Sharifa ta deseá pa kompanianan tin profeshonalnan, trahadónan sosial, coachnan. I no solamente djis papia den un workshop pero kada hende mester di un yudansa personalisá. Sharifa ta duna konseho personalisá i Liesje tambe tabatin mester di e yudansa personalisá ei. No ta mesun yudansa ku ta duna LIesje ta konta pa e otro. Kada hende ta diferente i kada un su yudansa ta diferente.
Aseptá i pordoná
Liesje no ta lamentá niun tiki kiko a pasa pasobra el a bira un hende mas fuerte. El a krea un opheto den dje, un forsa, ku awe e por bisa ku hopi kos ku por a kibr’e no a logra. El a blòkia e doló i biba rondó di e trouma, skonde mas tantu i mas leu posibel i el a sobrebibí. Awor tur hende ta wak e sobrebibí komo prioridat sin wak kiko tin paden. Sharifa a bisa ku Liesje tin di siña biba awor i no sobrebibí pa e ta kontentu ku su mes. I manera Liesje a bisa e ta un kaminda largu pero e ta riba dje. Liesje a aseptá loke a pas’é i pordoná su agresornan pa e por a sigui. Sharifa ta kere den kibra e kadena i e sirkulo visioso i esei por logr’é ku e konosementu.
