WILLEMSTAD.- Kampionato di Liga Soraida Juliana a start ku un tremendo apertura djabièrnè na Buena Vista Ballpark. E kampionato 2020 ta dediká na Corva Lourens. Ekiponan di Buena Vista, Domi, Santa Rosa, Soto i Souax a desfilá drenta Buena Vista Ballpark riba ritmo di brassband. Despues MC a yama invitadonan speshal, entre otro representante di Minister di Deporte sr. Amado Victoria, District Administrator sr. Urny Floran, presidente di Liga Soraida Juliana sr. Ruisandro Cijntje i Corva Lourens na ken e kampionato ta dediká. Rei di Tumba Hubenil Chrisander Leonora a interpretá Himno di Kòrsou. A duna honor na Soriada Juliana na ken e liga ta dediká. Despues MC a lesa e CV di Corva Lourens, siguí pa diskursonan di sr. Amado Victoria, Urny Floran i Ruisandro Cijntje. Corva Lourens tambe a dirigí palabra. District Administrator a huramentá hungadó, tékniko i mayornan. Finalmente tabatin sake di promé bala dor di Corva Lourens ku Soraida Juliana komo bateadó i Urny Floran komo kècher. Ekiponan a desfilá baha for di tereno riba ritmo di brassband. E promé wega tabata entre Soto i Souax den kategoria Little League, dilanti un públiko grandi na Buena Vistra Ballpark.
