Limpi Recycling; empresa lokal hopi impreshonante

2177

Debrah Nijdam i Mitchell Lammering a lanta Limpi Recycling na 2017. Nan a kuminsá komo un proyekto i traha algun mashin i wak kiko por hasi. Na 2018 e empresa mes a kuminsá drei ofisialmente. Debrah a konta a Djasabra ku e ku Mitchell a studia Industrial Product Ontwerper i di einan nan a siña e diferente tipo di plèstik, diferente mashin ku por usa pa traha produkto kuné i asina ora nan a yega Kòrsou nan a wak kuantu sushi ta bin kantu di laman i asta kantu di kayanan. Asina nan a disidí di traha mashinnan pa traha algu nobo ku e plèstik na Kòrsou. I asina Limpi Recycling a keda establesé.

 

Plèstik no ta disparsé

 

Manera Debrah a konta Djasabra, ku el a biba na Kòrsou te ku 2012 ora el a bai Hulanda bai studia. Promé ku esei no a hasi masha impreshon riba dje e sushinan ku ta bin na kostanan i tambe kantu di kaya. E ta kere esaki no a hala su atenshon masha pasobra  e no tabata konsiente di e problema di sushi. Despues ku el a kaba di studia, kaminda el a siña e peliger di plèstik i kiko e ta hasi nos naturalesa, esei a pone ku Debrah realisá kuantu sushi tin, kuantu daño e ta hasi pa hende mes tambe banda di naturalesa. Asina su wowo a habri pa tòg nan hasi algu over di dje. Mitchell di su parti a komentá riba e parti aki ku si mira kiko ta yega komo sushi na nos kostanan, por haña un idea kon grave e situashon ta. I ta hopi plèstik pasobra e plèstik ta drif i ta supla bai i p’esei esei ta hala mas atenshon. Pero ta hopi tipo di sushi mas manera tayer di outo i glas. Esun di mas grave ta plèstik pasobra e no ta disparsé.

 

Gravedat

 

Segun Debrah i Mitchell a splika, plèstik ta grave pa nos naturalesa pero tambe pa e bida bou di awa. Piská na Kòrsou ta importante i ora tin plèstik den laman, kímikonan ta keda riba e plèstik i ora e piská kome esaki e ta keda den nan sistema, den nan karni i esei e hende tambe ta kome. E hende mes ta venená su mes ku e sushedat aki.

 

Tipo di plèstik

 

Tin diferente tipo di plèstik. Kada un tin nan mes komponentenan manera tin mas fleksibel otro ta mas mihó den solo. Tin hopi tipo di plèstik pero e ta kategorisá den 7 diferente sorto. Tin e bòter di kos di bebe, tin e plèstik ku desinfektante den dje, tin plèstik di PVC, tin e PP ku ta e bakinan di manteka, tin ABS ku ta lego òf bùmper di outo. Ta diferente tin i no tur por resiklá. I tin algun ku si risaikel e mes e ta bira venenoso. Serka Limpi  Recycle nan ta resiklá e HDPE ku ta e bòternan di plèstik di kloròks, suavisante pa paña, plèstik di shampu i tambe PP. E tipo di plèstik aki no ta venenoso i esei nan ta resiklá. Segun Debrah i Mitchell a splika ku tin diferente hende ta trese saku di bòter pa nan i nan di nan parti ta traha ku Green Force ku tin kònteinernan na diferente supermerkado i otro lugá nan poné, einan por depositá bòternan di plèstik.

 

10 mashin trahá pa nan mes

 

Limpi Recycling segun Debrah i Mitchell tin diferente mashin ku nan mes a traha. Nan tin 15 mashin di kual 10 nan mes a traha. E proseso ta resiklá e tapanan di bòter di plèstik ta;

Proseso

Ta limpia e bòter nan esei ta tuma hopi tempu pasobra tin di kita e ‘label’ i tin di laba e parti paden di e bòter

Ta surti nan dòpinan na kolo

Despues ta ‘shred’ nan i hasi nan pida chikí chikí

Malchi

Miéntras tantu nan ta diseñá loke ta bai usa pa traha diseño pa e plèstiknan. Ta traha di malchinan den kual ta dirti e plèstik i asina yega na tur loke Limpi Recycle ta ofresé. Segun nan a splika Djasabra, nan ta ‘shred’ e plèstik chikí chikí, esei ta bai den un mashin ku ta dirtié i hasié manera un bals i ta bash’é den e malchi ku nan a traha ku e diferente formanan. E proseso pa yega na e produkto  kla ora e dirti ta bai basta lihé segun nos por a tuma nota.

Produkto pa hotèlnan tambe

 

Limpi Recycling tin diferente kliente. Nan ta traha produktonan komo suvenir ku nan ta bende rònt Kòrsou i tambe na Megapir pero tambe nan ta traha produktonan riba petishon. Nan a traha diferente produkto pa Avila Hotel, Marriott Hotel. Tambe nan a traha pa Chichi, pa MCB, Coca Cola resientemente.

Ekspandé

 

E tayer di Limpi Recycling ta poko chikí te ainda. Nan por duna guia pa konosé nan trabou si hende tin interes den esaki. Gustosamente nan ke mustra kiko nan ta hasi i asina krea e konsientisashon pa yega na un Kòrsou limpi. E empresa ta drei aktualmente pa Debrah i Mitchell so ounke nan ta buskando un kolaboradó pa por yuda ku e produkshon pero banda di esei tambe nan ke haña un espasio mas grandi pa nan por hasi nan negoshi, teniendo na kuenta kuantu  e trabou ta. Tambe nan tin hopi mashin i nan ke mas espasio pa por pone mas mashin ku ta duna e posibilidat di ofresé mas tipo di produkto. Nan ta traha no solamente obranan chikí pero tambe kashi kushina, mesa grandi, ko’i sushi, stul ku nan mesa. Tur esei traha di plèstik i mas di e dòpinan di e bòternan di plèstik.

 

Produktonan di plèstik bon pa nos klima

 

E plèstik ta masha bon pa nos klima pasobra e por kontra awa i tambe komehein ku ta un problema grandi na Kòrsou. No tin mester di fèrf e produkto pasobra ya e tin su koló. E tin su benefishinan.

Konsientisashon i surti plèstik

 

Debrah i Mitchell ta haña ku na Kòrsou hendenan no ta sufisiente konsiente i komprondé  e peliger di plèstik. E konsientisashon na Kòrsou ainda no tei. E kousa di plèstik no ta konsiente pasobra ainda hende ta bende nan sushi i nan porkeria. Kisas tin hende ta komprondé pero nan no ke hasié pasobra nan ta haña e kaminda largu pa nan kore bai landfill i tampoko ainda no por surtié. E ta kosta te ainda sèn i ta difísil pa e hende entregá e plèstik pa resiklá. Nan ke konsientisá no solamente riba e peliger pero e balor di bòter di plèstik i kuantu kos por hasi kuné.

 

Orguyoso

Tempu Debrah i Mitchell a kaba nan estudio na Hulanda, nan no a imaginá nan mes kaminda nan ta awe. Nan ta sumamente orguyoso di loke nan a logra. Nan tin mas di 40 mil produkto ku nan a traha kaba i esei ta impreshonante teniendo nan kuenta ku ta mashin ku nan mes a traha i sushi di nan mes isla nan por a resiklá. I aki 10 aña Limpi Recycling lo ta mas grandi, na un lugá muchu mas grandi hopi hende ta kana rònt den e tayer i pa nan por diseñá muchu mas. Nan lo ta na e otro islanan di Karibe tambe pa asina tambe logra ku no ta benta plèstik afó sin mas.

 

 

 

LAGA UN KOMENTARIO

Please enter your comment!
Please enter your name here