Emlyn Pietersz
Emlyn Pietersz ya no tin mester di muchu introdukshon mas. Un persona ampliamente konosí riba e tereno di guia di turista. Na diferente okashon nos tabatin e oportunidat di por a forma parti di e gruponan ku el a guia pa konosé sitionan na Kòrsou ku no fásilmente nos ta yega na dje i ménos ku nos sa nan historia. Pero Emlyn ta sertifiká i ta rekonosé pa su kursonan di guia di turista. I p’esei e bia aki nos a pone atenshon riba e parti di e kursonan ku e ta duna i kiko tur nan ta kontené.
Lisensia mundial
Emlyn a kuminsá guia for di dia e tabatin 18 aña e tempu ei pa Sonny Tours. Nan a dun’é un teksto i e tabata papia di brùg Juliana, brùg di ponton, Breedestraat èts., èts. Ora Emlyn a bai Hulanda, parti di su estudio di komunikashon el a haña tambe guia di turista. El a bisa ku e no por hasié pasobra ta na Hulanda nan ta i e no konosé e lugá bon. Pero a splika ku e por hasié pasobra ta meskos ku bo bai siña kanta òf aktua. Asina el a kuminsá e entrenamentu di guia di turista i ora el a bin Kòrsou el a keda krese te el a haña su lisensia riba nivel mundial.
Por duna lès rònt mundu
Guia di turista ta enserá hopi meskos ku Toutologia ta e habilidat pa konta un hende e mesun kos dos tres bia sin ku e ta “pleonasmo”. I serka e ta turista ta meskos, esta si e promé bia e no komprondé, ta splik’é un di dos i un di tres bia. Tambe tin por ehèmpel ku no por usa “Am am am” meskos ku naturalmente bo no por keda us’é kada bes. Meskos bo ta siña etnologia i orígen di palabra i bo ta siña ‘speech and language patalogy’ engeneral. E tipo di kursonan ei bo por aplik’é rònt mundu.
Premionan
Otro aña na 2025, Emlyn ta selebrá 30 aña komo guia di turista na Kòrsou. Bibando na Oropa na 1995 el a kuminsá traha pa un kompania na Kòrsou ku no tabatin sufisiente guia ku liñanan krusero tabata eksihí. I komo tal e ta sertifiká internashonalmente pa liñanan krusero. El a haña tur e premionan ku por a haña serka mayoria liña krusero rònt mundu. Meskos ku el a haña premionan tambe serka liñanan di hotèl. Entre otro el a haña premio di Marriott ku tabata algu masha eksepshonal siendo un persona ku no ta ni den servisio permanente di e hotèl aki.
Kurso ta importante
Tabata interesante pa nos a tende di Emlyn ku si mi djis sa sufisiente di Kòrsou si mi por funshoná komo un guia di turista. El a splika riba e partikularidat aki ku un hende mester sigui un entrenamentu. E promé parti ta loke ta sali for di bo boka ku ta konektá ku bo mente. Bo mester trein bon. Meskos ku ora un hende ta splika di brùg di ponton, tin por ta kere ku e ta subi bai laira ora e habri. Mester duna splikashonnan bon riba e parti aki meskos Emlyn a menshoná ku ta yama e brùg di ponton “the swinging old lady”. Esei no ta bon pero e mester ta The Old Swinging Lady. Esaki pasobra no ta for di dia el a kuminsá e tabata un Old Lady pero e tabata swing si semper. E tabata yama tambe e brùg yangadó. I p’esei esun ku ke traha komo guia di turista mester bai lès, e mester tin un bon IQ, mester sa e idioma i despues e kontenido. I Emlyn ta duna e kursonan pa guia di turista privá i e ta duna pa CTB. CTB huntu ku otro ministerionan tin un proyekto di hende ku ta buska trabou i enprinsipio mester trein hende ku ta buska trabou ku e fin pa haña guianan di turista.
Un tim ta enkargá ku e lèsnan
I promé ku e hende por drenta e kurso di guia di turista, e ta keda di skrin. Loke e turista ta mira segun Emlyn ku ta loke ta sali for di bo boka, pero nan ta tene kuenta ku e parti selebral. Mester wak di e hende ta kòrda kos bon, si e tin kapasidat di por papia. I komo promé lès ta haña e parti di logopedi di un logopedista i despues ta ranka bai ku ‘Public Speeking’ i’ voice building’. Ku esaki Emlyn a splika ku e no ta e úniko ku ta duna e lès, pero ta henter un tim nan ta. E mes no ta pasa nan eksámen pero ta otro hende ta tuma e eksámen i 20 otro entrenadó. Por ehèmpel tin ta duna e parti di flora i founa, otro ku ta duna di palunan di mangel, otro por splika di nos sèn i henter su splikashon di kiko e ta bin kuné.
Idioma ta obligatorio
Ingles i Hulandes ta obligatorio den kaso di Kòrsou pasobra nos merkado di mas grandi ta Ingles i Hulandes. Idioma ta interpretashon i p’esei bo mester por sa e idioma bon. I ta konsehabel tambe den nos kaso pa por papia spañó tambe.
Mester di mas guia di turista
Na momentu ku ta duna guia na e turista, mester wak e interes di e turista. Por ehèmpel segun Emlyn, si e turista bin na zuèmpak bistí e no ke bai sinta den banki di misa pa haña splikashon. Den turismo bo ta siña wak kiko e turista ke i den esei bo ta konsentrá komo e guia di turista. I por gana sufisiente ku e trabou di guia di turista. Turismo a krese bira asina grandi ku tur hende tin trabou. Dado momentu asta tin guia ku ta bula pipa, pasobra nan ta biba bon kaba. I lamentablemente no tin sufisiente guia di turista, Emlyn a bisa ku operadornan di tour ta man na kabes pasobra no tin sufisiente hende pa duna guia. Resien Emlyn a kuminsá ku un grupo di 35 persona i tambe el a kuminsá ku un privá di 25 hende. Un ‘quick scan’ a mustra ku mester di mas òf ménos 100 persona pa e trabou aki mirando e kresementu prinsipalmente den e sektor di krusero. Kuantu hende e guia di turista por guia na mes momentu. Segun Emlyn ta rekomendabel pa den e tournan di kana no ta rekomendabel pa mas ku 20 hende i si ta bai snòrkel por ehèmpel pa seguridat ta importante pa mantené na e kantidat di hende stipulá.
Kapasitá i rekapasitá
I unda bes pasa e promé kurso di guia di turista no ta nifiká ku bo ta kla. Pa semper di bo bida komo un bon guia di turista òf a lo ménos si bo ke ta un bon guia di turista bo tin di sigui kapasitá i rekapasitá. Por ehèmpel Emlyn a bisa ku si bo bai serka un hende bai plak uña i e hende ei a haña lès for di 8 aña pasá, imaginá bu kon e lo ta. Tur kos tin nan desaroyo, progreso, adelanto aktualisashon. I meskos un guia di turista tambe. I e aktualisashon no semper mester ta pa algu bon pero kisas pa algu malu tambe. Por ehèmpel den kaso di Sèptèmber 11, atake i gueranan i kon sensitivo un tópiko por ta. Por ehèmpel den un pais manera Alemania preferibel no papia di segunda guera mundial. Por ehèmpel e barku Aida ku ta bin Kòrsou ta aleman so i bo tin di tene poko konsiderashon i si nan puntra so por konta por ehèmpel ki Hitler sea komo sea kier a bula Shell pasobra ta nan tabata duna kombustibel na Merka. Pero tin kosnan sensitivo ku ta mihó no papia di dje.
Hura ku no ta papia nada malu di Kòrsou
Na momentu ku e persona gradua komo guia di turista, den su huramentashon dilanti minister e ta hura di lo no papia nada malu di Kòrsou. I asina e asosashon detektá ku bo a hasi algu malu e ta bai board ku ta hopi strèn i por hala aden bo sertifikashon i ‘badge’. I bon guia di turista ta keda bai e kursonan pa aktualisá. Emlyn sa di hendenan di for di 1996 ku ta sigui bai kurso pa nan aktualisá. I esaki pasobra e persona mes ta mira ku tin sierto progreso ku e ta keda atras den dje si e no sigui e kursonan pa kapasitá su mes.
Hinka servisio den nos hendenan for di chikí
Emlyn ta haña ku no tur kaminda nos hendenan ta konsiente di e importansia di e turismo i pa trat’é bon. I e ta kere ku esei ta debí ku parti di nos komportashon ta mará na nos pasado i dunamentu di servisio, esta sirbi un hende tin konotashon na otro kos. Por ehèmpel el a drenta un lugá i e no a yama bon tardi, un hende den rei a hasi un señalá i asina el a bisa bon tardi. I p’esei ta trein e hende ku maske e turista no a yama bon tardi, bonochi , bon dia, tòg sirbi pasobra mayoria hende ta kuminsá haña ku e servisio no ta mara na bo orguyo. Ta nos ta mara na e bon dia bon tardi. Nos konotashon ta otro. Nos falta prinsipalmente kos di servisio hink’é den nos hendenan for di mucha pa nan krese kuné.
Kòrsou un di e mihónan
Ora bo ta duna tur bo konosementu mester ta hopi pero bo no por papia hopi segun Emlyn. Si bo ta mira hende ta kome por ehèmpel un bolo di spòns, bo por drei bis’é ku serka nos e ta un Light bread. I asina tin nos yayanan di lechi ku tabata duna yunan lechi i kon e yunan di hende blanku komo e yaya ta lanta nan. Nan ta lanta ku zjeitu. I esei e turistanan ta haña masha remarkabel aki ku nos no tin rabia riba e blanku i esei ta pasobra nos no ta mira e hende blanku komo blanku pero nos ta mir’é ku e tambe ta yu di Kòrsou i tin mas yu di Kòrsou ku ta kana ku e strea hudiu na kadena ku e hudiu mes. Einan e turista ta haña e kos ei great. I pa bai den turista general nan ta ‘rate’ Kòrsou komo un di e mihónan.
