WILLEMSTAD.- Desishon a kai ayera den seno di Little League International ku tur kompetensia mundial di beisbòl i sòftbòl pa 2021 ta keda kanselá, meskos ku tabata e kaso den 2020. Un desishon ku di forma dirèkt ta afektá Kòrsou tambe si tene kuenta ku ya gastunan a keda hasí pa selekshonnan nashonal pero tambe pa tres kampionato regional ku lo a tuma lugá serka nos e aña’ki: den beisbòl, Intermediate i Junior miéntras ku serka e damitanan e kompetensia regional di sòftbòl Junior League.

District Administrator Urny Floran ayera a konfirmá pa EXTRA ku tur aktividat regional/ internashonal a para pa motibu dje pandemia. No opstante, ta evaluando e posibilidat pa tòg organisá por lo ménos un kampionato regional mas lat den di dos mitar di aña.

Floran a trese dilanti ku sin duda Kòrsou e aña’ki a prepará hopi bon ku bista riba e torneonan. Aña pasá tabatin algun bon ekipo i por bisa ku esakinan a krese, te ku hasta e dirigente ta tribi na sigurá ku Kòrsou pa 2021 lo a konta ku ekipo pa bira kampion mundial. Serka mucha hòmber, muchanan di Minor ku dos biaha a sali sup kampion Latinoamerikano e aña’ki a mustra di tin hopi potensial. Ta bini aserka ku nan a partisipá na un bon Torneo Kenley Jansen ku a hunga riba nivel hopi haltu.

Serka e damitanan, e mesun team ku aña pasá mester a hunga Junior ta bek den 2021 i nan ta sumamente fuerte pa por a bira kampion. Floran a asentuá ku hopi trempan a start ku e preparashon pa Kòrsou por tin vários bon ekipo pa nivel Latinoamerikano i Mundial.

Pa loke ta trata gastu ku ekiponan, Curaçao Little League a hasi gastu di unifòrm, a paga bòrg pa pasashi, etc. A hasi tur esaki trempan pa tene gastunan abou, pero awor tin ku hasi ‘damage control’. Unifòrmnan sea mas lat e aña’ki òf otro aña lo por keda usá. E gastu finansiero di material tambe ta algu ku no mester ta problema.

Torneo Latino na Kòrsou

Pa ayera nochi mester tabatin un reunion ku e liganan pa papia riba e posibilidat pa tòg tene un torneo Latinoamerikano aki na Kòrsou. Tabatin kontakto kaba ku Aruba i Pto. Rico i ámbos ta kere den esei, pero pa mas lat den aña i no den e lunanan normal di yüli i ougùstùs. Ta tene kuenta ku e posibilidat ku pa e lunanan ei ainda algun isla den Karibe lo tin e problema di Coronavirus.

Floran a asentuá ku no tin nada konkreto, pues mester papia ku e liganan riba e posibilidat ei pa despues ainda konsulta ku gobièrnu di Kòrsou. Pues den e situashon ku a surgi kaminda kompetensianan regional i Mundial ta keda kandela, ta mira ainda kiko por hasi riba un eskala mas chikí ounke teniendo kuenta ku eventual eksigensianan di salú.

 

Divishon Little di Merka lo hunga nan kampionato

WILLEMSTAD.- E desishon di Little League International pa para e kampionatonan regional i Mundial lo no afektá little league na Merka. Divishon Little (11-12 aña) ta hunga normal den e diferente liganan pa despues hunga regional i te hasta nan Mundial. Pa otro divishonnan si ta konta ku nan lo hunga solamente den nan respektivo liga i despues region, pues sin e parti Mundial.

LAGA UN KOMENTARIO

Please enter your comment!
Please enter your name here