WILLEMSTAD.- Polis ta informá ku un tim lo traha dirigí kontra di ponementu di fever. Esaki a bin entre otro debí na e publikashon di e video e siman aki, kaminda un outo a pone fever rònt di pòmpnan di gasolin na Vanddis na Marie Pampoen. Un situashon sumamente peligroso no pa bida di e shofùr so pero pa trahadónan, klientenan ku tabata kue gasolin, e mironesnan ku tabata graba i gosa e show i pa e área kompleto.
Segun polis ta bisa, último dianan por a tuma nota riba videonan ku ta sirkulá riba retnan sosial, kon algun persona iresponsabel ta pone ‘fever’ riba tereno di un pòmp di gasolin, sin para ketu na e konsekuensia desastroso ku esaki por tin si algu bai robes.
Kuerpo Polisial ta sensurá e komportashon aki i no ta tolerá tipo di aktitutnan deskabeyá asin’aki.
Aparte ku e shofùr aki no ta duna balor na su propio bida, no ta import’é tampoko kiko lo pasa ku esnan ku sea ta laborá na e pòmp òf ku inosentemente den e besindario di e pòmp na e momentu ei.
Den pasado ya tabatin kasonan kaminda shofùrnan ku tabata pone ‘fever’ a pèrdè nan vehíkulo, pero aparentemente esaki no a surti efekto di konsientisashon serka otronan, ku a keda kometé e desòrdu aki, poniendo bida di otronan na peliger.
En bista ku ta yegando fin di aña i ya polis tin eksperensia ku e kasonan di ponementu di ‘fever’ i pustamentu ilegal riba kamindanan públiko ta bai oumentá, entrante di e fin di siman aki lo tin un tim polisial ku ta enkargá su mes spesífikamente ku akshonnan kontra di e fenómenonan aki.
Polis ke alertá ku lo no solamente konfiská e vehíkulonan ku kua ‘fever’ òf kareda ta wòrdu tené, pero den kaso ku outoridat konstatá ku e aktuashon i/o komportashon di e shofùr na e momentu ei ta un atentado kontra bida di un otro òf e òrdu públiko ta wòrdu rachá, polis lo no basilá pa hasi detenshon.
Kuerpo Polisial ta spera ku tur siudadano lo sa di komportá nan mes debidamente riba kaminda públiko, tene kuenta ku libertat i seguridat di otro, pa evitá ku nos tin situashonnan di lamentá.
Polis lo keda vigilá i kaminda ku ta nesesario, nos lo aktua di forma severo i desidido, pa bou di tur sirkunstansia òrdu públiko keda garantisá.
