ATENAS, Gresia (AFP).- Entrante 2027, nan lo prohibí akseso na retnan sosial na muchanan bou di 15 aña na Gresia, segun e promé minister, griego Kyriaks Mitsotakis, den un video riba TikTok. “Nos a disidí pa dal un paso dilanti ku un medida difísil pero indispensabel: prohibí e akseso na retnan sosial na muchanan bou di 15 aña”, segun e dirigente.
Mitsotakis a trese dilanti ku den zomer benidero lo vota riba e medida miéntras ku e prohibishon lo drenta na vigor dia 1e di yanüari di 2027. E prohibishon lo keda apliká pa plataformanan manera Facebook, Instagram, TikTok i Snapchat, miéntras ku a ekskluí e servisionan di mensahe i plataformanan di video, entre nan Messenger, WhatApp, Viber i YouTube.
Australia tabata e promé pais na mundu pa bini ku un lei riba e tema aki, i den luna di desèmber último a prohibí pa menornan di 16 aña usa e plataformanan prinsipal, refiriendo na e nesesidat pa protehá nan.
Otro paisnan manera Spaña, Fransia, Portugal, Dinamarka, India i Méhiko tambe ke restringí entrada di adolesentenan riba retnan sosial.
Mitsoakis a eligí TikTok pa dirigí su mes na hóbennan dje pais i splika e motibu dje inisiativa. “Siensia ta kategóriko: ora un mucha pasa oranan dilanti di un pantaya, su serebro no ta sosegá”.
Dirigiendo su mes na mayornan, e mandatario a bisa ku “e prohibishon no ta mas ku un hèrmènt, i ku esaki no ta remplasá nunka e presensia di mayornan”.
