Lo sigui ‘schakel’; ta bai usa planta di gas di 2Bays

WILLEMSTAD.- Gerensia di Aqualectra a kaba di informá ku e situashon aktual ta nifika ku mester sigui ‘schakel’. Ku esaki lo mester keda kita koriente di bario pa bario kada dos pa tres ora. Durante di e relato di dia djis un ratu pasa tantu promé minister Pisas, komo direktornan di Aqualectra señor Garmes i señora Isenia a splika e situashon i asina purba konvensé nos pueblo di e frustrashon ku ta bibando aki.

Minister Pisas a yama e situashon kritiko i a menshoná naturalesa ku ántes tabata predesibel, esta ku por a bisa ki ora si i ki ora bo tin bientu pero awor kos a kambia i mas ainda ku El Niño, ku ta mustra riba un situashon di kalor ekstremo te 2027.

Mashinnan ku a wanta e kaida aña pasa awor no ta disponibel. 2Bays tin planta di gas den man di Global pero ku for di kuminsamentu di aña ta bek den man di 2Bays. Ta papiando awor ku 2Bays i nan ta hasiendo esfuerso pa denter di 4 dia e produkshon ei ta disponibel pa asina yuda suministrá koriente ku mester.

Sr Rudolf Garmes direktor tékniko a relatá e situashon for di 2024 te awor i e situashon di problema ku mashinnan ku a kibra i ku seguro mester a kubri esakinan. El a duna un bista di piesanan ku ta yegando i lo usa turbina di gas di 2Bays pa haña produkshon kontinuo pa yuda ku e kapasidat ku nan mester pa Korsou. Banda di esei tin 4 tim di 4 diferente kompania internashonal na Korsou trahando riba e unidatnan pa nan keda kla. Pero miéntras tantu lo sigui ‘schakel’, dependiendo di bientu i kada bes ku bientu lanta nan lo garantisa koriente pero ora bientu baha nan no tin mas kapasidat i lo sigui ‘schakel’ kada 2 pa 3 ora pa asina sòru pa repartí koriente pa tur hende Na korsou.