Presidente interino di Siria, Ahmed al Sharaa.
DAMASCO, Syria (AFP).- E presidente interino di Siria, Ahmed al Sharaa, a bisa ku lo tuma “entre kuater pa sinku aña” pa organisá elekshon den su pais i esei debí na tur e trabounan ku mester tuma lugá pa rekolektá datonan i preparashon.
“Mester di entre kuater pa sinku aña pa yega na elekshon”, segun e mandatario den un programa na televishon. Tambe el a primintí “un lei ku ta regulá partidonan polítiko” i a indiká ku Siria por ta “un repúblika, ku un Parlamento i un gobièrnu ehekutivo”.
Den desèmber, Al Sharaa a bisa na e planta di televishon Al Arabiya, ku e proseso pa yega na elekshon lo tuma sigur kuater aña.
E presidente interino a referí na “instrumèntnan teknológiko ku e pais tin mester pa por yega na estadístikanan konfiabel i bon kla” den un pais kaminda konfliktonan a kousa mas ku mei mion morto i a pone ku miónes di habitante a hui for di nan kas.
“Nan ta bisa mi pa organisá elekshon i ku e hendenan lo vota pa mi”, el a bisa. “Pero pa mi persona esei no ta importante. Importante ta pa e proseso por tuma lugá di forma korekto”.
Al Sharaa, un èks-kombatiente yihadista i hefe dje grupo islámiko radikal sunita Hayat Tahrir a lSham (HTS), konsiderá pa paisnan oksidental komo un terorista, a kambia su unifòrm militar pa flus ku dashi.
E t’esun ku a enkabesá un koalishon di gruponan islamita rebelde ku dia 8 di desèmber a deroká Bashar al Asadi i a tuma kontròl di un parti grandi dje teritorio sirio.
Apoyá pa Fukia, Arabia Saudita i Qatar, dos monarka riku di e Golfo, Al Sharaa a keda nombrá komo presidente interino pa un periodo di transishon no determiná, durante un reunion ku portanan será di su koalishon di gruponan armá.