WILLEMSTAD.- Resientemente un grupo di tripulante di e barku LOGOS Hope a hasi un bunita proyekto den Sentro di Detenshon i Korekshon Kòrsou. E proyekto akí tabata enserá ku klientenan di prizòn por a tèst wowo i tambe risibí un brel di bista grátis.
E reakshon bou di klientenan di prizòn tabata hopi positivo i nan tabata gradesido pa e oportunidat ku nan a risibí di por a haña un konsulta pa midi wowo i tambe risibí un brel di bista.
Mas aleu klientenan ku tabata deseá, por a hasi orashon huntu ku algun di e tripulantenan di LOGOS Hope. Tambe na e okashon akí prizòn a risibí un donashon grandi di buki, ku lo keda poné den e biblioteka di SDKK.
Gerensia di SDKK ta sumamente kontentu i gradesido pa e bunita proyekto akí.
