….Yegando mas serka di aña, dianan kaminda nos tin di kompartí ku otro mas ku nunka, Jarmilla Romana Roosje tin un proyekto di “loke ta bieu pa bo ta nobo pa mi”. Jarmilla no ta un persona deskonosí. E ta lokutora entre otro na radio kaminda semper por a tende ku notanan positivo. I awor e ke hasi muchu mas ku inspirá komunidat ku su palabranan. E ke duna bèk i p’esei e proyekto “loke ta bieu pa bo ta nobo pa mi”.

 

Presentadó di programa

E ta presentadó di programa i ta skibi hopi. E mes ta produktor tambe di programanan di radio i televishon. Ultimo añanan el a desviá poko i bai konsentrá mas riba otro kos. Semper ta bon pa bai un otro nivel, Jarmilla a bisa. Tempu ta malu i asta for di e tempu malu por saka hopi kos bon. Ta den tempu malu bo ta sa bo forsa, bo kreatividat. Sigur tempu malu ta un bon reto pa bo mes komo persona. E ta kere ku mester konsentrá mas riba e parti mental. Si papia tur dia ku kos ta malu i kos ta malu, e kos malu ta sigui bini.  Si keda bisa ku no tin sèn, anto sigur no ta bai tin sèn,. Mester usa e temporada aki pa krese i traha trapi pa sigui subi. Positivismo no ta skibí pero ta sali di hende. Por kue un situashon malu i hasié positivo. Saka djus di dje i sinti legria. Esun ku tin rosea tin tur kos i sobrá kos ta bo mes ta atraé.

https://youtu.be/kcK8ATFRZfo

Den e temporada di fin di aña Jarmilla ta stima. E ta bira hopi kreativo pa loke ta animashon, dekorashon i organisá. For di ougùstùs e ta puntrando su mes dikon tantu kos negativo asina i dikon no buska esun positivo pa tapa esun negativo. Ban buska positivismo den kas, ban buska inspirashon den kas.

Loke papia bo ta atraé

Hopi biaha tin hende ta bisa ku ta fásil pa papia pero ta e papiamentu ta fásil i loke bo ta atraé i loke bo ta pronunsiá bo ta atraé. Universo ta asina magnífiko ku nos tin hopi kos den man i tòg ke bai busk’e pafó, sperando e persona yega, e kos yega kual no mester ta asina. Si bo ke mira resultado den bo bida i mira éksito den bo negoshi, éksito den bo relashon e tin di sali di bo. Niun hende por hasié pa bo i bo tin e ‘tools’ pa hasié. Den kaso di Kòrsou si e kos no ta bon serka esun hende difísilmente e por pas’é pa e otro hende. Jarmilla Roosje a sigui bisa ku mester drecha kos serka bo mes promé, hasié bo mes stabil i e ora ei por pas’é over. I si un pa un hasié por yega na e totalidat.

 

Un “schouderklop” tambe ta importante

I nos ta kuminsá na nos mes i kontagiá i trèk otro. Mesun fásil ku un notisia negativo ta plama mesun fásil un schouderklop tambe ta yega i yega aun mas fásil. Mesun fásil ku nos ta hiba e notisia negativo nos por hiba esun positivo, mesun fásil por laga e hende mira ku tin speransa. “Dance in the fire”. Ku esaki Jarmilla ta kere ku e hende mester demostrá su kapasidat na momentu ku tin situashon i sirkunstansia. No ta eksistí problema. Tur kos ta momentu i e tin di kambia i e úniko ku por kambi’é ta bo mes.

 

17 aña na radio

Jarmilla a lokutá kasi 17 aña na radio. E tabatin hopi empuhe pa hasié i personanan manera Hermanito Narvaez ku tabata su empuhe. Tambe Rolly Fraai ku a bai kuné Venezuela i hink’é den dje, defuntu Alex Alberto ku tambe a push’e aun mas. Jarmilla a kuminsá serka Alex halando kabuya. Despues a kuminsá usa su grupo di baile i asina Jarmilla a sigui i a topa Norman Suarez di televishon ku a empuh’é. Asina el a topa hopi hende ku tabata dun’é e empuhe pa e hasi algu. I asina el a kuminsá den chikitu. Konsiente el a konsentrá ku e no ke hasi meskos ku otronan. E ke ta diferente, e ke drenta den loke ta falta. I ta e parti di motivashon el a sinti ku tabata falta. E influensia di un medio di komunikashon riba e hende eifó ta grandi. Jarmilla no kier a bai radio djis pa toka. E tabata ke pa e mensahe yega i e oyente sinti ku nan dos ta forma parti di dje i pa e hende sinti ku e ta den su kas i no simplemente sinta den un studio.

 

Asina Jarmilla a bin ku hopi kos i el a logra yega e oyente te den su kas. Pero dado momentu Jarmilla a sinti ku e kos a sali for di man. El a sali for di radio un ratu, sali for di televishon. El a sali for di notisia pasobra no kier a forma parti di kosnan negativo.

Motivashon i inspirashon

Jarmilla ta kòrda ku den su parti di motivashon i inspirashon, e tabata un di e proménan ku a hinka músika di gospel den radio. E tabata bai ku kasèt ku su kansionnan di gospel i tabata habri su programa ku alabansa. Su programa tabata kuminsá  5 or atardi i el a haña hopi reklamo, pero el a persistí i insistí. I einan Jarmilla a kuminsá krese pasobra e tabata dunando alabansa i adorashon. I asina e hendenan tabata habri nan kas pe, pa ku su programa i su palabranan por drenta. I for di aña 1999 Jarmilla ta haña ku el a logr’é. I awor aki por skucha kasi tur programa ku lokutornan ta kuminsá ku alabansa. Jarmilla a surpasá e barera ei.

 

Kuminda pa pensamentu

Tambe e tabatin “kuminda pa pensamentu”. E ta kue quotnan na ingles i tradusí na papiamentu. Awor aki mayoria lokutor ta trese e palabranan ei. Esei tambe ta hasié kontentu ku otronan a sigui i awor e ta buskando otro kosnan pa nan por siguié. E ke kosnan ku ta trèk hende pa tin e parti alegre, kontentu, motivá i ku radio bo por influensi’é fásilmente. Jarmilla a sigui splika ku el a guia asta algun lokutor despues di dje.

 

I pa mustra riba kuantu influensia lokutor i radionan tin Jarmilla a splika kon nan ta promové CDnan. I den su kaso e no tabata kere den promové un òf dos kansion so riba un CD pero e ta kere den promové henter e produkshon di e CD. I esei tambe a hasié diferente di otronan. E persona ku ta skucha bu, abo komo e lokutor ku ta mas serka di dje den su kas ku su programa, ta bai tras di e lokutor ei. Un lokutor tin influensia pa e parti musikal pero tambe pa su palabranan. E mikrofon ei tin mas balor ku tur loke ta pasa eifó.

 

Awor Jarmilla a bisa ku el a amplia su manera di mira kos i e no tin problema pa e ta su so. I e ta bèk na radio pa e usa e medio ei pa yega serka e personanan. No nesesariamente ta e lokutor òf radio tin di kambia pero serka dje ta importante pa e hende eifó skuch’é.

 

Duna na otro loke bo no ta usa

For di 1999 Jarmilla a kuminsá ku un proyekto pa duna bèk na komunidat. E tempu ei e proyekto tabata yama “Loke ta bieu pa bo na nobo pa otro”. El a kumins’é na Radio Krioyo 10 aña pasá. Esun ku tin hopi por duna. Tin hopi ta hasi e parti di kuminda pero awor e hende ku no tin stul, no tin paña, bentana kibrá. I p’esei Jarmilla a buska e buraku i sòru a e hende tin dak, eiskast, kortina etc etc. Si bo kambia bo kortina i otro kosnan di kas, e ta pidi pa dun’é pasobra e por yuda otro. I ora bo sinti e ta bieu i usabel e por regalá otro. E proyekto aki el a hasi durante di hopi aña. Pero despues di tempu e proyekto a kana den kaminda ku e no mester a bai. Pero el a disidí di kuminsá bèk ku e proyekto e aña aki i regul’é. E no ta e persona di laga pafó wak kiko e ta hasi pa otro. E no tin di bai ku radio, televishon ni nada. E ta yuda di su kurason i ta pidi otronan pa yuda. Esaki ta e proyekto grandi ku e tin den e temporada aki.

 

 

Mensahe

 

E mensahe prinsipal den e temporada aki ta “tur loke ku bo ke bo por. Universo a pone tur kos na bo disposishon. Motivá bo mes, ‘grade up’ bo mes den estudionan. Ki informashon ku bo ke bo ta haña i hasi bo mes un persona stabil pará den bo sapatunan. No bira fuerte kon traha sèn pero bira fuerte kon pa yuda otro hende.

LAGA UN KOMENTARIO

Please enter your comment!
Please enter your name here