WILLEMSTAD – Un aksidente lamentabel di trabou a sosodé awe na Seru di Sabana, Westpunt, nèt tras di restorant Jaanchie, kaminda un lòli a bòltu for di un seru durante trabounan di konstrukshon.
Segun informashon ku EXTRA a risibí, e lòli tabata trahando den e área kaminda tin un proyekto grandi di konstrukshon di diferente kas. Durante e trabou, e shofùr a pèrdè kontrol riba su vehíkulo pa despues bòltu bin abou for di rant di e seru.
E shofùr a risibí diferente herida, entre otro un man kibrá i posibel heridanan interno. Ambulans a yega lihé na e sitio pa duna e víktima e promé asistensia médiko, promé ku transport’é pa hospital pa tratamentu.
Polis a yama Inspekshon di Seguridat pa evaluá e situashon, ya ku, segun e promé indikashonnan por kuestioná e manera ku e trabounan tabata siendo ehekutá.
Inspekshon di Seguridat lo hasi un investigashon pa determiná si a sigui tur medida di seguridat. E investigashon di e aksidente ta sigui.
