LOUIE LOUIE

Un felis wikènt pa tur nos lektornan…

 Ayera nochi ‘Louie Louie’ a asistí na e homenahe musikal póstumo na Errol ‘El Toro’ i mester bisa ku e proyekto di formashon musikal di IpFM meresé e sosten di Gobièrnu…

 E desaroyo bisto di e hóbennan ku ta formando parti di Junior All Star ta impreshonante…

 E echo ku dos dje hóbennan a sigui lèsnan ‘online’ di Berkley College of Music i a kuminsá ta logra nan meta ku sertifikashon di spesialista riba nan instrumènt ta muestra ku e kuríkulo di e instituto ta un hopi bon…

 E produkshon di un CD/ DVD lo mester ta un biaha mas e konfirmashon ku e kalidat dje proyekto ta hopi bon i ku tantu Gobièrnu komo empresanan grandi mester por duna un kontribushon na e proyekto…

 Pa bo komo organisashon logra pa duna lès di muzik pa mas o ménos 700 hóben pa aña tambe ta algu di aploudí…

 Nos mester sigui traha riba desaroyo di e talento di nos hubentut, hasiendo esaki bo ta logra pa guia e hóben den e bon kaminda…

 Un biaha mas ta resaltá ku nos hóbennan tin hopi talento pa tantu músika komo deporte…

 ‘Louie Louie’ a tuma nota di e demostrashon di amistat grandi ku tin entre algun amigu di Renaud Cijntje…

 Ayera e amigunan a bai sorprendé Renaud kende ta rekuperando den e sentro di revalidashon ‘Mgr. Verriet’ ku loke mas e gusta ku ta muzik…

 Nan a toka kitara, kanta i entretené no solamente nan amigu Renaud, pero tambe tur e klientenan ku ta kedando den e sekshon kaminda Renaud ta hospedando…

 Hóbennan den e género urbano ta sigui produsí músika…

 Awor ta Titorasz ku ta bolbe presentá loke tin tur ingrediente pa ta un otro éksito pa e hóben aki pa 2017…

 Dreams tambe den e siman aki a saka un vershon adaptá di ‘Komehein’ di Stanley Clementina…

 Nashaira Balentien, nos Miss Kòrsou 2017 kende aktualmente ta na Ulanda ayera a hasi un photoshoot i nos ta pendiente pa manera ku Coridja Stars Production ta kla pa por kompartí e potrètnan ku Nashaira a saka na Ulanda…

 Wikènt di Zomercarnaval na Ulanda ta mustra ku un biaha mas esaki lo ta un di kita sombré…

 Ayera nochi nos por a tuma nota di un tremendo jump in ku a tuma lugá i ku a keda di stream pa nos amigu Lindomar di ESO riba su página di facebook…

 Tin basta moveshon entre entertainment bandnan lokal…

 Nos a tuma nota di algun moveshon estilo ‘quitate tu pa ponerme yo’ na sierto sentronan di dibertishon…

 Tin kaso tambe di artista òf banda ku no ta dunando resultado mas na kaminda ku nan ta presentando i esaki a pone ku doñonan di e sentronan aki a gradisí e artista i o banda…

 Bon disfrutá di bo wikènt, tin yen kaminda pa bai i awe Interpark ta habri atrobe pa pueblo di Kòrsou por bai dibertí…

 Nos ta topa djaluna awor den otro edishon di ‘Louie Louie’…

 

 

SHARE

LEAVE A REPLY