Un saludo pa nos lektornan…
Nos a yega 24 di yanüari, ta poko dia ei tur hende ta deseá tur lo mihó pa 2019, dianan ta bula…
Ensayonan ta tumando lugá, nos ta pendiente pa otro siman kuminsá duna tur hende un tiki dje sabor di ensayonan di tumba…
Ayera ma tuma nota di un lista di supladónan ku ta pendiente pa bin Kòrsou for di Venezuela relashoná ku Festival di Tumba…
Ta basta un par ta bini, segun mi e lista ta surpasá 10 músiko…
Entre nan músikonan ku tin sigur mas ku 10 aña ta biniendo Kòrsou pa duna respaldo musikal na un banda spesífiko o te hasta algun banda, dependé dje trabou ku keda ofresé…
Nan sosten musikal, kontra pago, ta yuda engrandesé e festival i mesora ta tira lus riba e falta di supladónan aki na Kòrsou…
E punto aki ta masha importante i no solamente AMAK pero tur e otro institutonan musikal mester kuminsá pone mas atenshon riba e instrumèntnan di supla…
Kasualmente ayera mi a tuma nota di otro proyekto kaminda un organisashon finansiero ta bai duna sosten na proyektonan kultural i di arte…
Mi ta spera ku un parti di e sèn por ser usá pa formashon musikal pero spesial pa lanta e interes den hóbennan pa instrumèntnan di supla…
Papiando di e materia aki mi ta hopi interesá pa sa kon ta ku e lèsnan ku a kuminsá na un skol na Sta. Maria kaminda mayoria lès lo a bira di instrumèntnan di supla…
Mi tei aserká e kordinadó pa tende di dje kon ta bayendo i si e proyekto ta andando ainda…
Ma tende ku ounke tin diskushon riba e asuntu di ‘streaming’ grátis i transmishon ku e miembronan di TDS no a pèrdè pa gana, nan a sa di probechá dje oportunidat di ‘early bird’ i a paga pa nan por disfrutá di Festival di Tumba 2019…
Na Aruba tin posibilidat di PPV i na Boneiru tur e 2 kompanianan di kabel a tuma e PPV di Festival di Tumba pa nan re transmití, pues e interes sigur tei pa sigui e Festival di Tumba di Kòrsou…
Esaki ta pone mi kòrda un biaha mas riba loke AMAK a enfatisá durante di nan rueda di prensa ku Festival di Tumba ta un palanka artístiko…
E plataforma prinsipal pa músikonan lokal por eksponé nan músika…
Definitivamente e repartishon di kantidat di partisipantenan ta bai keda praktikamente mesun kos ku aña pasá…
Si e informashonnan ku mi a risibí ta kuadra, tin algun grupo ku a bai atras na miembro i ku e miembronan aki a muda pa otro grupo …
Meskos tambe tin grupo ku a lanta i ku no ta kedando kla pa por ‘break even’ ku e kantidat di miembronan ku nan tin…
E situashon no ta fásil i lidernan di grupo mester ta masha kreativo pa ora Karnaval kaba den mart nan no keda ku debe…
Ma komprondé ku AMAK a tuma medida tambe ku algun persona ku tin e kustumber di inskribí tumba i no ta partisipá, ku e aña aki nan lo keda di skrap for di momentu ku inskripshon sera…
E medida aki mester a wòrdu tumá pasó ta tumamentu di hende hasi…
Nos a skapa di bandanan fantasma, awor ta kantantenan fantasma ta keda inskribí, òf ta inskribí un persona ku bo sa ku no ta bai partisipá, pero djis pe kick i podisé un título di komposishon chistoso…
Pueblo di Bándabou, un súplika, boso duna sosten na e organisashon di Karnaval di Bándabou…
Aktividatnan mester tin e kantidat di públiko nesesario pa por tin motibu pa organisá e aktividatnan…
Ma komprondé ku tin un preokupashon pa ku esaki i mester papia palabra kla, e pueblo di Bándabou mester sali kas i sostené e eventonan di Karnaval di Bándabou…
Si bo no hasi esaki, e ta pone ku sea no tin sentido pa organisá e aktividatnan mas i ku FKBB lo tin ku mantené nan mes na organisá eventonan popular so manera e Karnaval di skolnan riba djabièrnè i djasabra e Karnaval di Bándabou ku ta konta tambe ku asistensia grandi di gruponan di pariba…
Pa loke ta trata e elekshon di Rei i Reina Tiner, mester wak un manera pa bolbe atraé skolnan sekundario pa partisipá na e elekshon aki…
Si bo tuma nota bon e aña aki ta solamente 1 skol ta partisipando…
E sobrá 3 duonan partisipante ta representá organisashonnan sosial…
Aki tambe mester bai bèk na e kosnan básiko, fo’i delantá aserká skolnan i stimulá partisipashon di hóbennan na e elekshon…
Dia tabata reklamá ku VSBO St. Jozef ta gana tur elekshon, pasó e muchanan tabata simplemente bon prepará, nan a disidí di bula afó i laga otronan partisipá, awó ta resultá ku tur hende a bula afó…
Tantu Fundashon JAG komo AGKK ku indirektamente tin e skolnan ku ta partisipá na Parada di Tiner bou di dje tin ku stimulá e skolnan pa partisipá…
Kon ta bayendo ku prekario? Ta awor ku Festival di Tumba ta bai kuminsá e hendenan ta manera interesá pa kuminsá buska drechi di e lugá di para pa wak Karnaval…
Bon nos tei move, tabata un plaser…
Pa mañan nos tin un kos great pendiente pa presentá…
Si bo ta miembro di un grupo di Karnaval, sali kas bai duna un man pa bo grupo por ta kla trempan ku trabounan i ku nan por lusi durante di e marchanan…
Felis dia!…
