Un felis djárason na tur nos lektornan…

Pa Festival di Tumba 2019 Ike Jesurun ta e kompositor ku mas komposishon ku un total di 7…

Ta siguié Gregory Colina ku 6 komposishon…

Den areglo ta Gregory Colina tin 8, Titi de Palm ku 6 i Randal Corsen, Ravello Antoin i Axel Pikero ku 5 …

E duo di Marvin Snijders/ Ingemar Pieternella tin 3 komposishon meskos ku Gibi Doran…

Título di diferente komposishon ta masha chistoso i tin algun tambe ku ta pone bu pensa 2 biaha, pasó ta fo’i unda nan a saka e título ei…

E aña aki ‘Patriota Mayo’, Robert de Jesus no ta partisipá komo kantante, pero si komo kompositor…

E drangheknan ta liber, esei nos por a komprondé…

Tabatin un situashon kaminda Gobièrnu mester a kumpli ku esnan ku tin e drangheknan na nan enkargo…

Esaki parse ku a keda solushoná…

Gruponan i Polis tin e petishon pa pone dranghek fo’i Cubaweg te final di Marcha…

Tin e kantidat di dranghek pa hasi esaki, ta kestion di tuma desishon definitivo riba esaki…

Importante ta aworakí pa Gobièrnu lòs e prikichinan pa dje forma ei ponementu di stellage por start den e di tres siman di febrüari 2019…

Ayera tabatin atrobe un kontrol dje situashon riba Jan Noorduynweg, e salida di marcha…

Representantenan di DOW, Polis, AGKK, JAG tabata presente pa bolbe wak e situashonnan di atenshon ku tin riba e kaya …

Ta konfirmá ku tur vehíkulo lo mester subi Jan Noorduynweg for di rotònde di Jan Noorduynweg i sigui bin pariba te ora ku nan yega kaminda nan grupo ta para…

No tin fecha ainda pa kùrmentu di vehíkulonan ku ta partisipá den e diferente marchanan di karnaval…

E promé idea tabata pa laga e vehíkulonan kùr nan Keuringslokaal, pero parse ku esaki no ta posibel…

E último vershon ku nos a tende ta ku e Ministerio di Enseñansa, Siensia, Kultura i Deporte lo tuma responsabilidat dje kùrmentu di vehíkulo i lo bai hasi esaki naturalmente ku yudansa di ekspertonan…

E asuntu di ‘Pay Per View’ tambe ta tras di lomba…

Ayera e gruponan metí den e diskushon a bolbe reuní i e último informashon ku ta indiká ku a duna un splikashon amplio dikon Festival di Tumba no por ta grátis…

Ayera nochi ta Shon Hildo Manuela, e tesorero di AMAK mes a para splika e motibu pa kual no por duna ‘Pay Per View’ grátis…

Aworakí pa AMAK ta importante pa nan bai focus nan mes den benta di karchi i hasi preparashon pa e festival tin un salida fenomenal…

Massive ta trahando riba e stage pa esaki ta kla pa djabièrnè awor…

Ma komprondé di Jimmy ku ta djabièrnè lo bo por haña un bon impreshon dje stage na momentu ku tur kos ta buta na nan lugá…

Ta manera nos skibi poko dia ei, bo mester ta kreativo pa bo sigui krea diseñonan ku ta hala atenshon…

Den wikènt aki bandanan lo kuminsá instalá zonido grandi pa laga nan fanátikonan bin wak nan presentashon i kuminsá kustumbrá ku e tumbanan ya pa dje forma ei ora ku nan presentá nan risibí e apoyo di fanátiko mesora…

Tin banda ku te ainda tin nan sitio di ensayo un tiki skondí i tin otronan ku indirektamente ta hasi promoshon pa fanátikonan bin wak ensayo…

Nos a risibí e informashon ku Ronny Winklaar, konosido kantante, partisipante na Festival di Tumba a fayesé ayera…

Nos ke deseá e famianan forsa den e momentunan difísil aki…

Ku Ronny sosegá na Pas…

Nos tim di fotógrafo a kuminsá hasi bishita na ensayonan pa Festival di Tumba…

Ayera nochi nan a bishitá e ensayo di ONE i tambe ERA…

Na kada un tin un desaroyo, esun armando tumba ainda i serka e otro ya ensayonan ku brass a kuminsá …

Antayera Urvin Jano tabata na Aruba pa ensayá ku Buleria…

E situashon pa Buleria di ta partisipando den Festival di Tumba di Aruba i Kòrsou, anto aserka e Kaiso i Soca festival ta pone ku e banda praktikamente tur dia ta ensayando pa por logra kumpli ku e kompromisonan…

Siña tantu piesa asina tras di otro no ta wega…

Keda pendiente pa djaluna otro siman nos publiká e formulario pa partisipá den e kampaña di ‘Rei ken ta sali Rei òf Reina di Tumba 2019’…

E popular kampaña di EXTRA ku ta duna bu chèns di gana un pakete di premio ku ta inkluí tur loke bo tin mester pa kome i bebe durante di marchanan di Karnaval…

E pakete ta pa 10 persona, pues ta basta artíkulo di konsumo bo ta risibí komo premio…

Te ainda ta fresku den mi memoria kon un di e ganadónan dje kampaña a yega EXTRA ku un outo chikí pa bin buska su saku di premio, ora el a mira e mesa grandi nèchi dekorá i karga ku produkto el a kuminsá hasi sin ke stòp, ora a puntr’é ta kiko a pasa, e di mi outo ta muchu chikí pa boso premionan…

E mester a yama un ruman pa bin yuda hiba su premio kas…

Nos ta yegando poko poko e fin di siman di elekshon di embahadornan pa nos Karnaval…

Tin basta preparashon ta tumando lugá i kompetensia entre partisipantenan ta fuerte…

Ora mi sinta i analisá e 3 anochinan preliminar di Festival di Tumba, na mi konsepto djaluna lo ta e anochi ménos fuerte…

Djárason ku 4 banda aktivo den farándula ta e anochi mas fuerte dje edishon # 49 di Festival di Tumba 2019…

Bon shonnan, nos tei move, un felis dia pa bo…

LAGA UN KOMENTARIO

Please enter your comment!
Please enter your name here