LOUIE LOUIE

Un bon siman pa tur nos lektornan…

Fin di siman tras di lomba nos tabatin e elekshon di embahadornan pa Karnaval 2019…

A eligí Rei i Reina Tiner riba djabièrnè, esnan adulto riba djasabra i ayera públiko a yega foodcourt di Sambil pa disfrutá dje elekshon di esnan hubenil…

Tur tres evento a kana masha bon mes i Fundashon JAG huntu ku Incredible Events por mira atras riba un tremendo wikènt…

Nos tin nos embahadornan i awe sigur pa esnan hubenil i tiner lo tin selebrashon na skolnan…

Esaki ta dependé kon sigui ku e wèlga i si dosentenan dje skolnan konserní ta partisipá aktivamente na e wèlga kanta pa nan sindikato…

Nos a drenta e siman di Festival di Tumba…

Segun informashon di AMAK ta solamente 1 tumba a kai afó …

Ta trata di e promé tumba ku a inskribí e aña aki…

Un hóben a inskribí ‘Por mihó’ i nòmber dje banda ku lo mester a presentá komo di 3 banda riba djárason anochi tabata ‘Hou het simpel’…

E a kai afó, pero tin informashon ku tin 1 tumba mas a kai afó, pero esaki nos no por a konfirmá den wikènt, nos ta pendiente pa awe haña konfirmashon di esaki pa nos por publiká…

Ma kere ku AMAK lo a manda informá tambe di nan desishon di e kantidat di tumbanan ku lo pasa pa e gran final di Festival di Tumba ku ta tuma lugá djabièrnè awor…

Bandanan durante di wikènt a ensayá pisá, den esei tin banda ku a kumpli ku nan presentashonnan, miéntras ku ERA por ehèmpel a te asta biaha pa Boneiru pa aya presentá durante un evento di un partido polítiko…

Pero tur esaki a bai kompaña pa ensayo promé ku sali bai toka…

Tin bandanan ku a tuma e kompromiso di partisipashon di Festival di Tumba komo un hopi serio…

Te hasta den pitu, no konforme loke nan brass tabata zona nan a manda buska músiko for di Venezuela…

Gruponan di Karnaval ta trahando duru e dianan aki, den tur e ambiente di Festival di Tumba tin algun ku ta sigui traha, otronan ta tuma break pa sigui djasabra awor, despues di final di tumba…

Papiando di gruponan mi ta kòrda ku te ainda no a organisá kùrmentu di vehíkulonan di Karnaval…

E asuntu aki ta un serio i bo mester organisá e kùrmentu pa gruponan dado kaso tin algu pa drecha lo tin tempu pa hasi esaki…

Si sigui ku e pensamentu ku Karnaval ta te den mart i ku tin tempu pa hasi esaki, lo bo ta mal ekiboká, pasó dianan ta pasa masha lihé i tempu ta pèrta pa gruponan…

Ta den parti final di preparashon pa Karnaval ta bai drecha karosa, bar i treiler di músika, awor si tur hende mester warda pa ta sigur ku e vehíkulo ta bon pa bai marcha ta bira otro kos…

Kontròlnan di pèrmit riba negoshinan ku ta situá riba e ruta di Karnaval ta sigui e dianan aki…

Ta for di siman pasá nos a tuma nota ku tin kontrolnan ta tumando lugá i ku tin plania pa e bishitanan sigui tuma lugá den e simannan ku ta sigui…

Despues ta toka turno na e hendenan ku a pidi pèrmit pa bende konsumo riba ruta, nan tambe tei haña bishita riba dianan di marcha…

Pa awe e promé anochi di Festival di Tumba tin 1 debutante ku ta Thallysa Jano, e prinsesa di Urvin Jano, nos aktual Rei di Tumba…

Thallysa lo presentá ku Tune/ G-Spot…

Pa loke ta trata e sobra partisipantenan di awe nochi, segun mi ku eksepshon di 5 tur sobra a yega di klasifiká pa final di Tumba, pues ta bon tumbero tei presentá awe nochi…

Ku dos eks Rei i un eks Reina di Tumba, Icons by Gio lo ta e banda ku tur hende su atenshon ta riba dje…

Amos, Djuric i Doña Elia lo ta presentando ku Icons i semper ta interesante pa bo wak nan presentashon…

Wilfred Clotida ta na Kòrsou atrobe pa partisipá na Festival di Tumba, e pianista kantante tur aña ta hala atenshon pa su mensahe ku kada komposishon ku e ta presentá…

Ritzel Godfried i Patrick Raven ta presentando ámbos un komposishon di Ike Jesurun i tur 2 ta keda kompaña pa Ritmiko Caribenses…

Fenty Music di Boneiru ta presentá awe nochi ku Danny Yanga i Lady Lava…

E banda di Faysel Francisco ta su promé presentashon den Festival di Tumba…

Gedion Chandler ta e areglista ku tin mas tumba partisipando awe nochi den Festival di Tumba…

Kuater tumba tin su areglo…

Tico Libiee te úniko kantante maskulino ku Tune/ G-Spot ta bai kompaña, sobra 4 ta dama…

Ayera nochi nos por a apresiá di aserka e stage den Festival Center…

Plantashi Festival Center tin un mahestuoso Landhuis ku awe nochi lo keda iluminá i lo konta ku presentashon di 8 banda den su balkon…

Bon nos tei move, awe ta dia di yega kas, drumi un ratu pa anochi bo tei den Festival Center pa disfrutá dje promé anochi di Festival di Tumba 2019…

Pa esnan ku ta keda kas, sea via TDS òf Cariflix bo por sigui e transmishon…

Nos ta topa den Festival Center…

SHARE

LEAVE A REPLY