LOUIE LOUIE

Un felis djabièrnè pa tur nos lektornan..

E dia a yega pa e gran final di Festival di Tumba 2019…

Awe 30 tumbero lo interpretá nan komposishon pa dje forma ei yega na e Rei òf Reina di Tumba 2019…

Un total di 11 agrupashon musikal lo subi tarima pa kompetí…

Espektativa ta grandi i interes di parti di públiko tambe ta grandi…

E tres dianan preliminar a konta ku bon asistensia i awe esei lo ta e kaso atrobe…

Ayera nochi AMAK a tene su rueda di prensa pa dje forma ei presentá e mantel i korona, skohe e órden di presentashon i atendé algun punto di atenshon…

Un dje puntonan ku tabata di interes tabata esun dje kaso kaminda un persona for di den públiko a subi riba tarima i aserká e kantante Rocco Franken durante di nan presentashon den e showtime di djárason anochi…

Manera ta konosí e mucha hòmber ku a subi stage a pidi Rocco pa stòp di kanta un kansion ku e tabata kantando…

Rocco na su turno a kana baha fo’i tarima loke a fasilitá pa por a baha e mucha hòmber tambe for di riba tarima…

E tim di maneho di Buleria den un karta ku a keda emití ayera tardi a indiká bon kla ku e mucha hòmber no a menasá  Rocco niun momentu …

E tim di seguridat di Festival Center bou di direkshon di Rigo Thode a garantisá ku un kaso manera esun aki lo no ripití…

E situashon aki a hala basta atenshon i te hasta un negoshi renombrá na Aruba a pone un ‘post’ riba facebook kaminda nan ta ofresé ‘bulletproof vest’ na benta pa esnan ku ta biniendo Kòrsou pa Festival di Tumba, esaki sigur no ta nada bunita …

E órden di aparishon pa awe nochi ta presentá manera kustumber diferente senario pa loke ta trata suerte di kantantenan…

E echo ku komo faboritonan Amos ta presentá promé, siguí despues pa Ray i mas lat den anochi Dibo ta pone ku algun analista ta spekulá ku presentando mas lat bo tin e bentaha ku bo ta haña e públiko animá i ku atenshon pa bo presentashon…

Di otro banda ami ta di opinion ku riba e anochi final si bo presentá bon, no ta importá unda bo presentá…

Hurado mester ta na prim pa por husga bo presentashon i abo i bo banda mester pèrkurá pa den warm-up lanta e públiko i pone kla pa animá bo presentashon…

Ma hasi awor’ei menshon di 3 dje finalistanan ku mas nan nòmber ta keda menshoná komo posibel faboritonan pa awe nochi…

E festival ta un di komposishon i tin algun otro komposishon ku letra masha bon mes i ku tambe meresé e atenshon na momentu di presentashon…

Awe nochi e Final di Festival di Tumba lo kuminsá mei ora mas tempran ku presentashon di Doble R ku algun invitado den un showtaim di mei ora…

Despues dje presentashon di Doble R lo sigui ku e programa ofisial…

Durante dje anochi lo rindi un homenahe na Roy Senchi, baluarte na kende e Festival a keda dediká…

Tin sigur 10 hóben den e final di awe nochi, algu di aploudí mirando ku e plan di relevo den Festival di Tumba ta funshonando…

Entre tur e kabayeronan tin 5 dama ku ta partisipando den e final…

Axel Pikero ku Ravello Antoin tin 5 areglo den e final, Gregory Colina, Dwight Leoneta i Titi de Palm tin 3 kada un…

Kuater Rei di Tumba di kua 3 di nan ku posibilidat di logra nan di 4 korona ta hasi e anochi aun mas interesante…

Awe nochi Kòrsou, Aruba, Boneiru, Ulanda i rònt mundu kaminda tin un ‘Antiano’ lo ta den goso di e gran final di Festival di Tumba 2019…

Ban disfrutá di loke e músikonan ta bai presentá awe nochi i sostené nan den nan presentashon…

Nos ta topa awe nochi den Festival Center…

SHARE

LEAVE A REPLY