LOUIE LOUIE

Un bon siman pa tur nos lektornan…

Dibo Doran djasabra mardugá a keda koroná komo Rei di Tumba 2019…

Masha pabien pa Dibo ku e logro aki…

E ta bira e promé Rei di Tumba Hubenil ku ta konkistá e korona di Rei di Tumba…

Ma gosa riba facebook e komparashon ku ‘Tio Chuba’,  a hasi di e logronan di Dibo Doran…

Un pabien tambe na tur e otro finalistanan…

Definitivamente e órden di aparishon tabatin un bentaha minimal riba e resultado…

Ta dependé kon bo haña e públiko e ta hunga un ròl…

Ehèmpel di djabièrnè último ta e presentashon di Amos Balentin, e mes a sinti ku e públiko no a reakshoná manera e a spera…

Un públiko grandi, ta ser kalkulo ku a superá 10 mil hende den Festival Center…

E festival a kaba lat i segun mi tabatin diferente faktor ku a hunga un ròl…

Un di nan sigur ta e ponementu di banda kuminsá toka pa animá públiko den tempran, mester a usa Doble su presentashon riba un dje dianan preliminar i no riba djabièrnè…

Djabièrnè bo sa kaba ku bo tin 11 banda i 30 tumba pa toka, ke men bo sa ku bo ta bai kaba mas lat ku kualke otro dia, mester a wanta e show na estriktamente e finalistanan…

Bandanan mes no ta koperá pa e kambio tuma lugá den 10 minüt òf ménos, mester atendé e asuntu aki…

10 ora di show ta hopi largu, tantu pa esnan den Festival Center komo esnan ku a sigui e transmishon na kas…

T’aki Tin a bolbe skor ku nan tremendo jump in…

E shon Ananka ku a yega di manda karta riba molèster di zonido den área di Landhuis Brakkeput Mei Mei, mester a drumi kualke otro kaminda djasabra último…

E públiko tabata den goso total i esei huntu ku muzik ta subi e desibel sigur!…

Ayera nochi Gruponan di Marcha di Kabai, Marcha Hubenil, Tiner i Grandi a skohe nan órden di aparishon durante di un evento organisá pa AGKK…

Nos ta pendiente pa risibí e numerashon ainda di AGKK, nan a duna gruponan grandi e chèns pa por hasi kambio di number i pa ayera nochi mes lo mester a publiká e lista definitivo, pero esei no a sosodé…

Ma tuma nota ku tin 8 grupo di Marcha di Kabai, 24 grupo di Tiner i 25 grupo pa Marcha Grandi, e kantidat di Hubenil no ta konosí pa nos…

EXTRA ayera nochi a saka e ganadó dje kampaña ‘Rei ken ta Sali Rei di Tumba 2019’, un kantidat basta grandi di formulario a keda entrega ku masha hopi kombinashon di ganadó…

Dibo Doran, Ray Lauffer i Amos tabata esnan ku mas tantu a aparesé…

Skibimentu ta un arte, durante dje kontròl di formularionan nos a risibí diferente ‘handschrift’ ku ta na nivel di dòkter…

Tin hende tambe ku no sa nòmber dje kantantenan mes òf ke skibi apodo dje kantante, pero pa kolmo ta skibi esaki fout…

Djasabra awor ta fecha pa harma stellage, dia tambe pa e parada di baiskel ku lus, pues ta kestion di harma stellage tempran i bin bèk anochi pa disfrutá di e kareda di baiskel den ambiente di Karnaval…

Nos tei move, wikènt tabata largu, pero ta awor e goso ta bai start…

Bon siman !…

SHARE

LEAVE A REPLY