LOUIE LOUIE

Un felis djárason pa tur nos lektornan…

 Hopi preparashon tumando lugá den gruponan di Karnaval…

 Presentashon di trahe di Karnaval di algun grupo tei tuma lugá próksimamente i kada un ke hasi e bon impreshon pa dje forma ei logra di mantené nan kantidat di miembronan i logra pa atraé mas miembro…

 Preparashon di aktividatnan di fin di aña tambe ta tumando lugá i bo por bisa ku lo tin un kalènder di aktividatnan amplio pa baidónan di fiesta skohe for di dje…

 Ma komprondé ku Cache lo no ta na Kòrsou pa fin di aña, e banda tin kompromiso na Ulanda i lo no bini abou manera tabata e kustumber pa mas ku 10 aña kaba…

 Gentz e wikènt aki ta na Aruba pa presentá huntu ku Buleria den ‘Bella Festa’, un ‘all in white party’…

 Great di tuma nota ku Dibo, Edion Boy, Cynthia i Jandino a topa otro i kompartí un ratu ku otro…

Manera e foto a keda publiká riba retnan sosial, mesora e pensamentu a bai riba un show ku nan kuater huntu, ta kon esaki lo ta? …

 Mañan anochi tin ‘Salsa Sessions’ den Pietermaai na Mundo Bizarro ku Edsel ‘Payo’ Juliet i amigunan…

 Amantenan di Salsa ta kos di bai, deskarga musikal di nos mihó músikonan lo ta na òrdu di dia…

 Pa e amantenan di pelíkula relashoná ku ‘African Diaspora’ e siman aki Teatro Luna Blou ta kuminsá ku presentashon di 4 pelíkula relashoná ku e tema…

 Un dje pelíkulanan ku sigur lo hala atenshon e siman aki i otro siman ora ku e keda presentá ta ‘Mama Africa’, e dokumental relashoná ku e bida di Miriam Makeba…

 Kumpra bo karchi tempran na Mensing’s Caminada pa bo bai wak un dje 4 pelíkulanan ku ta bai wòrdu presentá…

 Ta ser premirá ku karchinan lo kaba fo’i prebenta…

 Justin Bieber ta bishitando un Iglesia na Merka. E organisashon a bisé ku e mester skohe su amigunan bon, esaki a pone ku el a distansia su mes for di e bòksdó, Floyd Mayweather i awor Mayweather a bira manera loko…

 Ata Blac Chyna a kita for di su kabei blònt i tin awor un ‘wave’ pretu ta kana rònt kuné…

 Mason a los ‘Kuné’, e hóben rèper a logra mantené su nòmber ku e produkshon aki komo un dje artistanan dje género urbano mas gusta na Kòrsou…

 Djasabra awor tin dje tantu kaminda pa bai ku si bo djis hinka den bo kabes ku tur hende sali praktikamente lo no sobra hende na kas…

 Legumai farándula, segun mi si bo ke wak e pelea di Mayweather i Connor, bo no tin nodi di skohe, paso ta na kada skina di hanchi tin un lugá ku ta pasando e pelea…

 No ta wega, Mayweather i Connor ta bai gana masha hopi sèn mes na ‘pay per view’…

 Nos tei move, djabièrnè nos tei bek ku otro edishon di ‘Louie Louie’…

 

 

SHARE

LEAVE A REPLY