LOUIE LOUIE

Un felis djabièrnè na nos lektornan…

Nos a yega e wikènt di entrega di premio di Karnaval 2019…

Basta suspenso pa ken ta keda eligí komo Grupo di Aña 2019…

Premiashon di Karnaval lo tuma lugá riba Kleine Werf i lo tin dos evento, 4 or di atardi esun hubenil i 7 or di anochi e grandi…

E wikènt aki tambe tin e apertura di temporada di Seú ofisialmente…

E Santo Sakrifisio di Misa lo tuma lugá djadumingu awor na Basílika di Santa Ana…

Pa 7 or di anochi lo tin misa i despues ta sigui un parada chikí pa Plasa Brion kaminda lo tin un anochi kultural…

Djaluna awor Digicel ta anunsiá e ganadó di su kampaña…

E premio ta 10 mil florin pa un grupo di Karnaval…

Bon premio ku ta yuda sigur…

Ayera nochi a tuma lugá boutismo dje CD nobo di Glenn Martis, pa mañan nos lo duna kobertura na e boutismo…

Moveshon den bandanan a start, Dolce a yama bon biní na dos músiko ayera via di nan página riba Facebook…

Klepo i su tim no para ketu niun momentu, bai bo ke bai, no problem, ami tin ku sigui…

Ban wak awor kon e sobrá kambionan ta bai desaroyá…

Ta hopi mas tin pa bai pasa..

E lucha pa bandanan entre gruponan grandi di Karnaval ta bai sigui…

E loke sigur ta bai bira interesante ta e formashon di bandanan pa Karnaval 2020…

Tin músikonan ‘freelance’ ku ta kuminsá djòin otro pa ofresé nan mes komo banda…

Pero e problema ta kontratá kantantenan pa bai ku e bandanan…

Nos ta premirá ku preis lo bai subi, pasó kantantenan popular sigur lo bai merkado liber pa wak nan balor promé ku nan firma ku kualke banda…

Esei tei pone ku tin banda ku sea for di aworakí mester firma kontrakt, si firma kontrakt ku kantante pa evitá doló di kabes ora yanüari yega…

Tin kantante ta bisa si aworakí, pero ora otro pone mas sèn riba mesa nan ta kuminsá tambaliá…

Ya kaba ma tuma nota di un kantante ku a tuma desishon pa bira ‘solista’ bèk, paso el a mira ku einan tin mas sèn ta drai ku si e keda forma parti di un banda…

Rene Bishop ku tabatin un tremendo presentashon den e kompetensia na Ulanda di ‘Senior Voice of Holland’ tin un solo presentashon mayan anochi den ballroom di Hilton Hotel. Karchi ta optenibel na Radio Krioyo…

Fundashon Kultural Seú Kòrsou a hasi un bon eskoho pa skohe algun kordinadó pa eventonan ku nan tin riba nan kalènder di aktividat…

Bo mester laga otro yuda bo organisá, bo mes sigur lo no por hasi tur kos…

Great pa tuma nota ku kada persona ku a keda skohe ta un ku ta dominá e evento ku nan ta bai kordiná…

Bon nos tei move, disfrutá di bo wikènt…

Te djaluna ku Dios ke!…

 

SHARE

LEAVE A REPLY