LOUIE LOUIE

Un bon siman na tur nos lektornan…

Nos a drenta e siman di Kantadó Mayó…

Klup di Shell lo ta e sitio kaminda e aktividat kultural ta bai tuma lugá …

Kaminda mas ku 70 partisipante lo kompetí pa dje forma ei nos saka nos Kantadó Mayó pa Selebrashon di Seú 2019…

Pa awe nochi tin 25 partisipante, 2 a kai afó for di e lista original di 27 partisipante…

Awe nochi fo’i 8 or di anochi e festival di Kantadó Mayó ta kuminsá i espektativa ta haltu serka diferente dje gruponan rítmiko ku ta partisipando…

Ayera tabatin ensayo habrí kaminda públiko por a presensiá diferente dje gruponan rítmiko nan ensayo …

Esaki a bai te hasta kompañá pa bendementu di kuminda…

Ma tende parti dje splikashon di un músiko ku a bandoná banda pa bai forma parti di un otro i awor e ta sin trabou, serka niun di dos…

Awendia no laga niun hende primintí bu trabou, anto bo ta kita promé bo tin e otro sigurá…

‘Chòpòchòpò’ na Ulanda a resultá un éksito ku 2 sala ‘sold out’…

E konsepto ku e grupo a presentá ta algu ku por sigui keda presentá, pasó nan ta aktualisá e presentashon segun dianan ta bai…

Kiko ku pasa ku a hala atenshon, nan ta pone den dje…

‘Hats off to Dreams’ a tene nan Happy Hour di yama danki i ta pendiente pa kuminsá prepará pa 2020…

Tin otronan a kuminsá kaba i mester bisa ku tin basta espektativa…

Ma tuma nota di un banda ku a toka den Gran Marcha ku praktikamente a pèrdè su base musikal i ku esaki lo mester ta preokupashon no solamente pa e lider dje banda, pero tambe pa e grupo ku lo tin ku sali buska un banda pa toka pa nan òf nan mester hasi manera otro, harma bo mes kos …

E aña aki kaba bo por a tuma nota ku diferente dje bandanan ta buska refuerso te hasta pa den Gran Marcha di músikonan venezolano…

Bandanan a zona mas mihó i esaki lo pone ku nan lo sigui hasi uso dje servisionan di supladónan venezolano…

Tin basta espektativa tambe pa CIFFR, e festival di sine ku próksimamente ta tuma lugá …

Tin vários hende ku mi a kombersá kuné ku ya a kuminsá prepará nan agènda yenando esaki konforme e lista di pelíkulanan ku lo bai wòrdu presentá…

E interes di parti di produktornan lokal di sine tambe ta kresiendo, esaki sigur ta loke ku e organisashon di CIFFR kier a logra…

Nos tin hopi talento lokal ku ora bo ‘challenge’ nan, nan ta saka kara i den e kaso aki tambe…

Tin 3 evento kulinario grandi ku ta pendiente pa tuma lugá praktikamente tras di otro…

Eventonan sosial kaminda e públiko por sali i dibertí den un ambiente trankil i dal drinks ta esnan ku sigur e último 2 pa 3 aña ta halando bon públiko…

E públiko tambe ta buskando diversifikashon den ambiente, anto eventonan kulinario ta sòru pa esaki…

Bon siman !.

Siman a habri, ban traha huntu pa adelanto di nos Kòrsou!…

SHARE

LEAVE A REPLY