Un felis djárason…
Seú ta dominá e siman aki i mester bisa ku nos tabatin 2 anochi preliminar ku algun bon seú ku a keda presentá…
Bo ta ripará e diferensia mesora entre e gruponan ku ta dediká nan mes hopi na serio pa ku nan presentashon den Kantadó Mayó…
E orguyo di grupo i personal ta sòru pa un adrenalina úniko riba tarima…
Awe te último dia preliminar i espektativa ta haltu pa e presentashon di e gruponan rítmiko ku ta presentá awe nochi..
Situashon di un organisashon musikal ta na ‘hilu’…
E problemanan a subi bira un berdadero kataklismo pa e organisashon pone ku nan no tin praktikamente un skapatorio pa e situashon…
Den pasado na algun okashon a trata pa yuda e organisashon dor di tuma maneho over, pero esaki no a logra…
Awor ta di lamentá ku e organisashon ta den un situashon kaminda ku nan no por kumpli ku nan debernan…
Di un forma stratégiko a sinta plania i sera praktikamente tur porta pa e organisashon aki…
Awe Rubby Perez i Sergio Vargas ta yega Kòrsou pa nan presentashon djabièrnè awor…
Ensayonan di e dos bandanan ta kanando bon i ayera nos por a tuma nota dje refuersonan ku a yega pa ámbos banda…
E kombinashon di ERA i Gio ta mané tei buska un moda di lanta kabes…
Tin 2 fiesta kaba ku tin kasi mesun kombinashon i ta kestion di ban wak kua di nan 2 lo dal…
E públiko i gruponan rítmiko ku ta asistí i partisipá na Kantadó Mayó mester kuminsá pensa riba un otro sitio pa organisá e festival…
Klup di Shell ta chikí, nan sa, pero ta manera ku si bo no organisá e festival ei den e no ta bai bon pa loke ta asistensia…
E públiko di Kantadó Mayó ta mané nan gusta un ‘saldinchi den bleki’, pasó ta pèrtá pèrtá ta !…
Djabièrnè awor, fecha dje final di Kantadó Mayó 2019 lo bo duna nos rason…
Djasabra nos ta pendiente e konsierto di Aemy Niafeliz ‘Mané Bo Ta’ ku lo tuma lugá den K-Center na Brievengat
Aemy ta invitá su fanátikonan pa bin disfrutá di un anochi musikal kaminda lo e presentá su éksito…
Kumpra bo karchi i duna sosten na nos artistanan lokal…
Aemy, kos bon sigur!
Awe nochi despues dje presentashon dje gruponan di Seú nos lo sa ken ta e 30 finalistanan pa e gran final di Kantadó Mayó 2019…
Nos tei move, kuida kurpa te Djabièrnè ku Dios ke!…
