Un bon siman na tur nos lektornan…
Kon a bai ke wikènt? …
Pueblo di Kòrsou tabata riba kaya e wikènt aki…
Tur evento a risibí bon asistensia i loke a resaltá ku kada evento tin nan gremio di fanátikonan ku ta asistí na e eventonan…
E konsierto klásiko den Fortkerk tabatin un sala yen di públiko ku a disfrutá dje presentashon dje músikonan i kantantenan lokal…
Na Jandino su show ‘Keihard’ tabatin mas ku 2500 hende presente pa hari bai gol ku su presentashon…
E konsepto dje show di Jandino tabata otro for di loke e públiko a kustumbrá kuné, esta un kómiko ku e so komo artista presentando…
‘Keihard’ su konsepto tabata un kómiko interkambiá ku músika i aki ta di aploudí ku Jandino, manera e mes a splika semper ta sostené artistanan lokal…
E echo ku huntu kuné a presentá Gino Coelho i su banda, Stanley Clementina i Naomi Silvanie ta muestra ku e ta kompartí…
“Qube” komo organisashon a skor hopi bon i ta pendiente awor pa 2 show mas pa e sobrá di 2017…
Nan a hasi promoshon pa un show di magia ku ta na kaminda den luna di òktober i pa desèmber ta pendiente pa e presentashon di e formashon musikal ‘Kuenta i Tambu’ ku Röel Calister na kabes…
Na Renaissance e tres Reinanan di Karibe a duna un tremendo show i e públiko sigur a disfrutá…
Tabatin algun malkontentu na inisio dje show, pero ora ku e artistanan a subi tarima tur hende tabata ‘all smiles’…
E sitio kaminda Renaissance a organisá su konsierto ta bon!…
Ban spera ku e hotèl lo sigui organisá evento na e sitio i òf laga promotornan organisá evento di kalidat na Renaissance Ocean Front Park…
Ma komprondé ku Dreams ta pendiente pa algu grandi ku ta na kaminda…
Nos tin tur informashon, pero ta laga e organisashon dje evento mes anunsiá loke nan plan ta pa luna di desèmber…
E banda a risibí un enkargo ku ta algu tremendo…
Ta di dos okashon segun mi ku ta aserka Dreams pa un proyekto asin’aki…
Biaha pasá tabata durante di un evento di ‘destaho’ ku e banda a duna un presentashon presentando un repertorio ku artistanan ku no sa presentá normal ku e banda…
E organisashon pará tras dje evento ku lo tin presentashon di e kantante dominikano/ puertorikeño, Ozuna…
Nan ta pendiente pa den e dianan ku ta bai bini organisá un rueda di prensa pa anunsiá tur detaye dje konsierto ku ta pendiente pa bai tuma lugá awor dia 4 di novèmber próksimo…
E siman aki lo tin músika di Jazz rònt Punda i Pietermaai, e organisashon ta pendiente pa duna mas detaye i presentashon di artistanan durante dje evento…
Bo ta sinti bèrdat un falta enorme pa loke ta trata Curaçao North Sea Jazz…
Tur e eventonan ku a keda organisá rondó di CNSJ a sigui normal, ounke ku e aña aki no tin e festival…
Nos tei move, un bon siman!
