Un bon siman pa nos lektornan…
Wikènt ku áwaseru, pero aktividatnan a sigui, sea a posponé òf a krusa dede i sigui kuné…
E fiestanan ku mi a chèk kon a bai kuné a bai bon…
Na Boneiru ICONS tabatin un tremendo presentashon…
Plenchi tabata yen i e públiko sigur a disfrutá dje presentashon …
Grupo Paraiso Hubenil tambe a organisá su elekshon di Reina, Prens i Pancho…
Mas grupo mester hasi esaki, organisando bo elekshon bo ta krea fondo i bo ta duna sosten na e elekshon di Reina, Prens i Pancho di Karnaval Hubenil…
E siman aki segun ma komprondé lo tin rueda di prensa di Fundashon JAG, organisashon enkargá ku Karnaval 2020…
Tin yen pregunta pendiente pa nan i òf Minister di Kultura kontestá…
E echo ku tin yen spekulashon i ku nan no ta desmentí apsolutamente nada ta duna e impreshon ku tin ‘algu’ ei…
Ban spera ku nan lo por duna tur informashon na momentu ku nan tene nan rueda di prensa…
Nos a tuma nota tambe di e fayesimentu di Francis Faries, konosí komo Payaso Pipo…
Francis a kanta ku diferente agrupashon musikal, La Tremenda, Mondongo Special i segun mi te asta ku un Típiko…
Pa Festival di Tumba, loke mi tin registrá ta 1 partisipashon ku Clark Elisabeth…
Un bon animadó ku a sa di entretené hopi hóben…
Un bon presentashon di e Selekshon di Futbòl di Kòrsou…
Pa a logra un empate ku Costa Rica e tim a move hopi bon, tin kos pa drecha pero a bai hopi bon, algun bon oportunidat pa hinka gol no a logra…
Mas i mas e selekshon ta demostrando ku nan ta riba bon nivel…
Nos ta pendiente pa den e último dos lunanan pa yen aktividat i konsierto…
Ayera ma tuma nota di promoshon ku ta wòrdu hasí kaba pa shownan ku ta pendiente den temporada di Pasku…
Tur hende ke start trempan pasó nan sa ku lo tin yen aktividat na kaminda…
Te asta promotornan di fiesta a kuminsá promové nan kombinashon pa dianan di fiesta…
Tin te asta fiestanan ku karchinan ya ta riba merkado…
E proyekto pa restourá e pinturanan ku tin riba muraya den Bajonetstraat na Otrobanda tei bira otro atrakshon mas pa e área di Otrobanda…
Den luna di desèmber e pintor Ras Elijah lo ta na Kòrsou pa restourá e pinturanan…
Tin idea pa lag’é hasi algun mas tambe, loke sigur lo bolbe rebibá e area kaminda e pinturanan aki ta…
E ta bira otro atrakshon mas pa esnan ku ta duna guia i informashon na turistanan pa nan bishitá den e área di Otrobanda…
Nos tei move, djárason nos tei bèk ku Dios ke!…
