Un bon siman pa tur nos lektornan…
Un fin di siman kargá ku evento ta loke nos tabatin tras di lomba…
Grupo Zjangilae djasabra anochi a presentá nan trahe pa Gran Marcha 2020…
E sirkulo di bida, ‘The Circle of Life’ ta nan tema pa Karnaval 2020…
Pa Karnaval di Bándabou e grupo ‘Deluxe Dolls’ a presentá nan wega di skak…
Un kos ku ta sigui resaltá ta e echo ku nos gruponan pa Karnaval a pèrkurá pa presentá trahenan bunita i bon akabá pa Karnaval 2020…
E trahenan ku a keda presentá te ainda ta mustra ku nos lo tin un Karnaval sumamente bunita…
E trahe nashonal ‘Dushi’ di nos representante pa Miss Universe, Kyrsha Attaf a keda presentá djasabra anochi…
Un trahe bunita ku sigur lo kapta atenshon durante dje sertámen di Miss Universe…
Ma gosa e inisiativa di algun músiko pa limpia e rotònde di Santa Rosa…
Ta e intenshon pa bai dekorá e rotònde próksimamente i pa fasilitá esaki algun músiko a uni…
Ma mira Gino Genaro, Axel Pikero i tambe dj Danger trahando riba rotònde…
Un konsierto magnífiko ta loke ku Agensia Funeraria El Tributo a presentá ayera na Morada Santa na Bottelier…
‘Thxgiving Concert’ tabata un konsierto pa yama danki i rekordá esnan ku no ta huntu ku nos mas…
EXTRA, bo korant faborito a bria ku su transmishon di ‘Thxgiving Concert’…
E reakshon pa ku e konsierto tabata tremendo…
EXTRA a risibí vários reakshon for di su siguidónan na Ulanda i tambe na Kòrsou…
Haidel, e lugá a bira chikí, mester kuminsá pensa riba un otro set up pa e konsierto…
Na Randal Corsen i su músikonan un palabra di felisitashon…
Evita i Richard a bria ku nan presentashon …
Mane kustumber Dibo, Yumarya i Rich a duna tremendo presentashon…
E orkesta i su sekshon di vio a lusi tremendamente…
No ta ko’i broma pero, Randal i su tim di RCO ta impreshoná ku kada presentashon i esaki ta sigui habri porta pa nan…
Tur e último konsiertonan importante ta nan a keda skohe pa sea empresanan grandi òf organisadónan pa kompaña òf hinka un repertorio spesial pa nan okashon…
Awe nochi tin e selebrashon di Dia di Músiko na ABVO…
AMAK a prepará un selebrashon kaminda manera te kustumber di tur aña ta hasi entrega di e premio ‘Edgar Supriano’…
Den wikènt ainda tabatin diskushon i un biaha mas mester a splika ku e premiashon no ta bai a base di un kompetensia…
Awe tardi Miss Universe Curaçao, Kyrsha Attaf lo tin lansamentu di su buki…E buki aki ta den kuadro di labornan sosial di nos Miss Universe Curaçao…
Tambe ta e intenshon pa hasi obranan di Karidat i hasi donashon ku e buki…
Nos tei move, bon siman!…
