Nos a yega otro djabièrnè…

 

Medidanan a keda alargá pa 2 siman mas i situashon ta primi pa empresanan ku ta será na e momentunan aki…

 

Nos palabranan di kondolensia ta bai na famia Markwell i tambe na famia dje konosido pianista ‘Didi’ di Forsa 2, ku Dios duna ámbos sosiegu eterno…

 

Kada un ku fayesé, ta un di mas, hopi tristesa COVID a trese pa famianan aki na Kòrsou…

 

AMAK tambe a saka un komunikado pa enkurashá músikonan bai vakuná…

 

Den e mesun komunikado bo por a tuma nota ku AMAK un biaha mas ta demostrá nan disponibilidat pa bini ku konseptonan ku lo yuda pa habri Horeca i presentashon musikal manera e oportunidat presentá…

Awor ku a habri e chèns ku lo por kuminsá vakuná sin tin mester di traha sita, esaki tambe lo yuda…

 

John Francis ta sigui demostrá su talentonan musikal ku su produkshonnan estilo ‘Home Session’, tin biaha ku kolaborashon di diferente músiko i na algun okashon ku un kantidat limitá di músiko…

 

John ta forma parti di agrupashon musikal K’ribe …

 

E challenge di ‘Sana nos Pais’ tambe ta resultando algu hopi great, ma tuma nota e siman aki e kolaborashon entre Gregory Colina i Ms. Ebony Gwenn Martis…

 

E gran pianista Gedion Chandler tambe a presentá su vershon ‘pianisimo’ di ‘Sana nos Pais’…

 

Aworakí ku lockdown ta bon momentu pa nos sigui enkurashá otro ku tipo di mensahenan positivo…

 

Ta bon momentu tambe pa bòltu e mentalidat pa un positivo, pa ora nos tin e situashon bou di kontrol, nos ranka sali ku spit di djèt pasó ‘Positivo ta na Moda’…

 

Segun mi tin demasiado outo riba kaya ainda…

 

Den e siman aki ma tuma nota ku tòg tin basta hende ta trafiká riba kaya i nan ta trata na kore e rutanan di mas straño pa nan por desviá di e kontròlnan di Polis…

 

Restorantnan ku a keda será e último 2 simannan aworakí ta kontemplando pa habri i brinda servisio di ‘delivery’…

 

Tin gastunan pa paga i nan no por duna nan mes e luho bai henter un luna sin traha, mester traha i logra pa sikiera por kubri e gastunan mensual…

 

Hopi hende a kuminsá kana sea mainta trempan òf atardi, e echo ku bo ta praktikamente será den kas ta pone ku bo mester move pa tene kurpa den kondishon…

 

Hopi ta wardando e momentu ku por bai laman sikiera ta un ratu, laman ta yuda pa relahá e kurpa…

 

Bon nos tei move, kumpra bo kosnan ku bo mester na kas trempan pa dje forma ei bo pasa bo wikènt i sigur bo djadumingu trankil…

 

Hopi demostrashon di arte kulinario atrobe riba retnan sosial…

 

Felis wikènt! Deskansá e wikènt pa djaluna nos habri siman di un forma produktivo pa adelanto di Kòrsou…

LAGA UN KOMENTARIO

Please enter your comment!
Please enter your name here