Un felis dia pa bo ku ta lesa ‘Louie Louie’…

 

Awe ta manera un djaluna, pero siman a parti na dos aki…

 

Masha hopi reakshon ayera riba sigur facebook pa kon e komportashon di e hulandesnan ayera na Hulanda den selebrashon di Dia di Rei…

 

Bo ta mira ku e pueblo ta masha liberal i ku nan ta gosa sin preokupá ku tin posibilidat pa por keda kontagiá ku COVID…

 

Aki na Kòrsou e kantidat di kasonan aktivo a baha ayera ku 423 loke sigur ta di aploudí…

 

E kantidat di personanan interná na CMC tambe a baha, loke ta duna un alivio sigur na e tim di profeshonalnan ku ta laborá na CMC…

 

Ban spera ku e kasonan aktivo por sigui baha pa fin di siman òf kuminsamentu di siman lo por suavisá e medidanan ku tin aktualmente…

 

E kos mas importante ta sigui kuida…

 

Ma tuma nota di un dokumental ku ta trahando riba e género di músika di kòmbèk…

 

Mi tei buska moda di kombersá ku e produktor e siman aki pa tende mas di nan kiko ta e idea tras dje dokumental aki…

 

Keda pendiente pa un artíkulo ku nos lo kompartí riba e dokumental …

 

Great pa tuma nota i kompartí dos komposishon ku a keda produsí spesialmente pa Dia di Mama…

 

Awor ta na radio pa promové i mantené e kustumber di toka piesanan pa Dia di Mama den e dos simannan ku falta aki promé ku Dia di Mama…

 

Restorant i demas sitionan di Horeca ta pendiente pa por habri bèk di forma normal…

 

E situashon di keda praktikamente 1 luna será òf solamente habri ku sierto posibilidatnan di hasi negoshi a resultá den un sla tremendo pa e doñonan i trahadónan…

 

Ounke ku bo por risibí sosten finansiero pero ta konosí ku no ta tur hende ta ‘up to date’ ku nan situashon finansiero loke ta hasi difísil pa nan por risibí sosten…

 

Aworakí ora habri bèk ta importante pa nos tur sostené nos empresanan lokal, esaki por mira for dje punto di bista ku bo ta sostené e trahadónan…

 

Loke ta importante ta pa habri ku koutela i duna espasio pa poulatinamente sigui ekspandé orarionan pa nos sigui tene tur kos bou di kontròl…

 

E echo ku awor lo bai den bario pa vakuná tambe tei yuda sigur, no ta tur hende por move bai un dje sitionan di vakunashon…

 

E promoshon pa sigui vakuná tambe mester sigui, paso mester sigui konsientisá e hendenan riba riesgo…

 

Ta konosí ku lo keda un grupo ku no ta interesá pa vakuná i e porsentahe ei ta algu ku bo mester ta konsiente di dje ku esaki lo tei…

 

Awe ta djárason, siman a parti na dos, importante ta pa nos lanta tur dia pa traha i produsí pa hiba nos pais dilanti…

 

Te djabièrnè ku Dios ke!…

 

LAGA UN KOMENTARIO

Please enter your comment!
Please enter your name here