Nos a yega djabièrnè i ta pendiente pa djaluna awor nos tende un suavisashon dje medidanan imponé pa Gobièrnu…

 

Hopi hende a mané kansa awor si di e medidanan ku nos ta pasando aden aworakí…

 

E situashon di no por move ta pone ku e hendenan ta realmente kansa i ke tende ku a suavisá e medidanan pa nan por ta liber pa hiba nan bida manera nan a kustumbrá…

 

Pa farándula si suavisá na e manera ku nos tin ta pensa lo e duna sigur esnan ku ta den e parti di ‘entertainment’ chèns ku nan lo por kuminsá presentá atrobe…

 

No muchu leu nos ta kere ku obranan teatral lo por kuminsá presentá…

 

Ta interesante pa sa kon kada promotor lo krea nan evento pa e públiko por asistí i logra pa tòg mantené e reglanan básiko di distansia sosial i e parti higiéniko…

 

Tin diferente proyekto pendiente i e promotornan di eventonan grandi ta warda pa nan por haña ‘lus bèrdè’ pa nan por organisá nan evento …

 

Ora bo mira kon kreativo nan ta na Hulanda pa loke ta trata ‘test lab’ i kon ta kontrolá promé ku bo drenta kualke evento ta pone bu pensa ku e implementashon di esaki tambe lo ta posibel aki na Kòrsou…

 

Ki efekto lo bai tin riba si bo a vakuná òf no a vakuná lo ta kos di mira…

 

Na Oropa nan a aprobá kaba e implementashon di un pasport pa biaha ku lo laga esun vakuná move fásil rònt Oropa…

 

Ku lo sigui implementá esaki na otro partinan di mundu, si…

 

Tin hopi hende aki na Kòrsou mes ku ta pendiente pa por bai ku fakansi, manera esaki bira posibel nos lo mira sigur un oumento di hendenan ku lo biaha…

 

E temporada di fakansi aki mi ta premirá ku hopi hende lo bandoná Kòrsou un ratu pa bai keiru bin bèk…

 

E banda ‘Trendz’ a lansa ‘Traka Triki’ kantá pa Michelangelo Martina, konosí komo MJ…

 

E piesa tin un dushi zuai i ta produsí ku e pensamentu di por yega e grupo abla spañó, loke ta masha bon mes mirando e influensia Latino e último añanan riba nos islanan…

 

Bon produkshon!…

 

E pensamentu di produsí piesanan ku no ta bula 3 minüt ta masha bon mes, paso e ta duna e piesa mas chèns di keda toká durante di kualke programa na radio…

 

Mas largu e piesa ta, mas e dj òf animadó di radio ta bai pensa pa toka e piesa i promové esaki…

 

Nos mester sigui sostené nos artistanan lokal pa nan por sigui produsí músika pa animá nos…

 

Tin mas produkshon musikal ku ta pendiente pa wòrdu lansá den e dianan aki, nos ta keda pendiente pa por sigui disfrutá di loke ta keda presentá…

 

Disfrutá di bo wikènt, ban trankil i kòrda kuida!…

 

Felis wikènt…

LAGA UN KOMENTARIO

Please enter your comment!
Please enter your name here