Un bon siman…

 

Tin un tiki lus na final dje tùnel, esei nos por start e siman kuné…

 

Min pres a pidi e pueblo pa keda spòrtif, dado kaso bo no a bakuna i ku Gobièrnu anunsiá medidanan ku lo konta solamente pa esnan ku no a bakuna…

 

Tin tur indikashon, despues di a sigui e rueda di prensa di Min Pres Pisas ku Gobièrnu na momentu di implementá e Health App lo bini ku medidanan ku lo benefisiá esnan ku a bakuna di un banda i lo tin konsekuensia pa esnan ku no a bakuna…

 

Awor e loke ta mas importante ta e kontrol ku mester tuma lugá pa evitá ku ounke a tuma medida, hendenan lo trata na falta ku regla…

 

Pa e sektor di Farandula e situashon aki lo ta hopi difísil, mirando ku tur hende lo start ‘stret’, pero ku despues den pèrta di anochi, ora ku bo mira ku tin yen hende para pafó i ku ke drenta fiesta, pero nan no ta bakuna, lo bo habri porta i pone sèn dilanti di seguridat dje públiko ku ta den fiesta…

 

Sigur mirando aworakí ku ta dos luna a sobra, ya ku nos ta yegando mitar di òktober kaba…

 

Ta hopi aktividat lo bai tin kaminda lo por spera un kantidat grandi di públiko…

 

Ban spera ku Gobièrnu lo por hinka un bon tim di kontrol den otro spesial pa aktividatnan kaminda lo para durante henter e anochi i kontrolá na entrada di fiestanan, stail di ántes ora ku BAB tabata kontrolá na porta …

 

Organisadó i promotornan mester ta konsiente dje riesgo ku nan ta pone e públiko ku asistí na e fiesta bou dje impreshon ku tur hende den fiesta ta bakuna…

 

Kon tei hasi ku e kantante i músikonan ku no a bakuna? …

 

Ounke ta parse ku nos ta vislumbrá ku lo tin un solushon na kaminda, pero tin yen di reto pa ku esaki…

 

Pa eventonan normal, e medida pa duna oportunidat pa por aseptá mas persona ta un alivio sigur pa organisadónan i tambe doñonan di sitionan kaminda por organisá evento…

 

Promé kos aworakí, Gobièrnu mester bin ku un plan kon ta bai suavisá e medidanan i kon lo kontrolá esaki…

 

AMAK, UdA i tur otro organisadónan i promotornan mester ta konsiente i prepará pa por hasi adaptashon na e manera ku a kustumbrá di organisá aktividatnan…

 

Ban spera ku lo tin un bon apertura kaminda tantu e sektor di Farandula i tambe tur e negoshinan ku di un òf otro forma ta benefisiá ora tin kualke aktividat i òf evento ta tuma lugá lo por sali benefisiá for dje desishon di Gobièrnu…

 

Kòrda keda spòrtif!…

 

Nos tei move, otro siman ta habri, ban spera ku den e siman aki ora ku duna oportunidat pa por kuminsá inskribí den e Curaçao Health App ku esaki funshoná sin ningun problema…

 

Kòrda ku promé ku anunsiá kualke suavisashon di medida, duna e sektor tambe un palabra den e toma di desishon…

 

Bon siman!….

LAGA UN KOMENTARIO

Please enter your comment!
Please enter your name here