Un felis djabièrnè…

Nos tei drenta wikènt i un kos sigur ku bo por a kuminsá tuma nota di dje ta e diferente promoshon pa diferente tipo di aktividatnan farandulero a kuminsá subi…

Tin hende ku ainda ta wak i evaluá promé ku nan sali bai kualke evento, pero otronan ta kla pa kuminsá disfrutá di bida manera nan a kustumbrá…

Djárason atardi mi a kombersá ku lider di un agrupashon musikal ku sa partisipá na Festival di Tumba i su promé reakshon tabata ku e invershon ku e tin ku hasi pa duna un bon presentashon den Festival di Tumba si e no tin garantisá kon e ta hasi di sikiera saka su invershon, sin konta ganashi, for dje temporada difísilmente e lo partisipá, pasó ta un invershon den bashí…

E punto di bista ei ta meskos serka diferente otro hende ku mi a papia kuné…

Aworakí tantu AMAK komo AGKK mester yega na un kònsènsùs ku Gobièrnu pa nan sa kiko i kon por organisá eventonan rondó dje temporada normal di Karnaval, ounke ku Gobièrnu a indiká ku lo no tin Karnaval 2022…

Un kos ta sigur, por pidi pèrmit pa organisá evento riba nan kurpa i esei ta loke ku ambos organisashon ta trahando riba dje…

Si gruponan bai organisá ‘Jump in’ òf eventonan similar esei lo por bira atraktivo pa bandanan invertí pa partisipá den Festival di Tumba…

Spònsernan tambe ta buska garantia pa nan invershon i no por stens solamente riba ‘Pay Per View’ pa nan despues mira un ‘Return on Investment’…

E loke AGKK lo kier organisá lo no por ser denominá komo Karnaval, pasó Gobièrnu a bisa kaba ku lo no tin Karnaval i ta sigur ku nan lo no kita for di e punto aki…

E plan pa por hasi e loke ku AGKK a presentá durante di rueda di prensa mester bira ‘self supporting’ pa esaki por bira realidat, pasó ban ta sinsero, bo mester di seguridat durante dje evento i esaki normalmente ta na enkargo di Polis ku ta keda pagá dor di Gobièrnu…

Awor bo organisá bo evento i Gobièrnu indiká na bo for di prinsipio ku e no ta organisá Karnaval, ta abo mes mester kubri e gastunan di seguridat, loke ta hasi e evento karu…

Mester hasi un bon análisis pa mira si di bèrdat e evento por sostené i kubri tur su gastunan…

Spònsernan sigur lo wak e evento ku wowo di falki promé ku nan invertí…

Pa bandanan tambe e invershon lo no kambia, sea e treiler ta kore 1 kilometer òf 14 manera e largura dje ultimo ruta di Karnaval ta, e gastunan ta keda igual…

Nos tei drenta novèmber i te ainda mi no a tende ku a tuma un desishon riba temporada di Aguinaldo i Tambú…

Lo permití presentashon den airu liber?…

Ban spera ku pronto nos lo tende ku tin reunion ku e lidernan di grupo pa dje forma ei tur hende keda informá di kiko por spera dje temporada…

Disfrutá di bo wikènt!…

LAGA UN KOMENTARIO

Please enter your comment!
Please enter your name here