Bon siman!

 

Wikènt ta tras di lomba i nos a drenta otro siman ku ta trese su espektativanan…

 

E komedia nobo di Anthony Jamanika ‘Treno Mayo a blo den fiesta di Come Back’ tabatin un bon wikènt…

 

E anochi di estreno tabata yen i ayera nochi nan a logra di hala algu mas ku mitar dje sala…

 

ONE su presentashon di djasabra a bai bon, públiko a sali pa disfrutá…

 

‘Sugar’ a habri bèk i nan ta satisfecho kon e promé fecha a bai…

 

No e drùk ku nan a spera pero kontròl di QR code a bai bon, ounke aki aya tabatin hendenan ku a vakuná ku no por a bini kla pa haña nan QR code…

 

‘Louie Louie’ a kombersá ku tantu Archel i tambe Anaiz i ounke situashon no ta fásil pa nan sigur ta un komienso i ta spera ku e siman aki e públiko sigui oumentá …

 

Den mundu di kòmbèk si e situashon a keda pèrèmpèmpèn, no e kantidat di públiko ku a ferwagt na fiesta…

 

Villa Royal den kabamentu di siman pasa tabata un punto di diskushon atrobe…

 

E fiesta ku tabata planiá pa tuma lugá ei den a keda posponé pa e siman aki den Club Sugar…

 

Villa Royal ta un diskushon pa algun tempu kaba pa loke ta trata e edifisio mes su kondishon i e ponementu di aktividat musikal den e lugá…

 

E loke ku a sosodé na Houston, Texas durante dje konsierto di Travis Scott kaminda Drake tambe a presentá a bira notisia internashonal…

 

Un káos kompletu ku 8 morto i kantidat di hende ku a keda herida durante dje konsternashon ku a surgi na e konsierto…

 

Ora bo kere ku ta durante aktividatnan ku ta tuma lugá den un sitio será so bo tin chèns di eksperensiá un kaso asina ta resultá ku den konsierto ‘habrí’ tambe e ta sosodé…

 

50 mil hende riba otro, ku uso eksesivo di alkohòl i indikashon ku tabatin uso di droga ta motibu pa algu asina por tuma lugá…

 

Nos ta pendiente pa tende den siman aki ki desishon tei tuma pa loke ta trata orario di seramentu di negoshinan di Horeca…

 

E kantidat di personanan ku ta interná den hospital ta abou, loke ta un dje puntonan ku ta kontrolá na momentu ku ta bai evaluá pa duna mas espasio/ orario pa keda habrí na Horeca…

 

Gobièrnu ta pendiente pa un aktividat ku presentashon di Gruponan di Aguinaldo pa otro siman…

 

No tin masha informashon ainda riba e evento aki, pero nos ta pendiente pa manera nos risibí informashon nos komuniká esaki ku nos lektornan…

 

Interesante pa sa kiko lo ta e kondishonnan pa presentashon di Grupo di Tambú i Grupo di Aguinaldo na sitionan manera nos a kustumbrá…

 

Den pasado resien tabatin adaptashon di e reglanan i awor ku nos ta den e situashon kaminda Tim di Krísis ta tuma desishon, lo mester wak ta kiko lo bira e kondishonnan…

 

Un bon siman pa bo, nos ta bai, djabièrnè nos ta bek ku otro ‘Louie Louie’…

LAGA UN KOMENTARIO

Please enter your comment!
Please enter your name here