Un bon siman pa nos lektornan…

 

Impreshonante e entiero ayera di Boy Dap…

 

Un entiero nechi hinka den otro kaminda no solamente músikonan, pero tambe nos dignatarionan a duna e famia e atenshon ku nan meresé…

 

E legado di Boy Dap sigur lo keda bibu serka amantenan di músika di Kòrsou…

 

Otro gran músiko lokal a fayesé den e dianan ku ta tras di lomba…

 

Djabièrnè nos a lubidá di menshoná, pero Renaud Cijntje, konosido kitarista i un dje fundadónan di Trio Los Corsarios a fayesé…

 

Forsa na famia i amigunan di Renaud…

 

Nos a kuminsá otro siman i tin yen di promotor ku ta pendiente di Gobièrnu pa tende kon lo para ku e orario di ‘toke de keda’…

 

Djasabra último durante dje programa di NJ Roosje na Mi95, e spesial di ‘Kings of Hits’ mi por a tende e promotornan dje fiesta tambe indiká ku nan ta wardando riba ki desishon Gobièrnu ta bai tuma, si no nan lo tin ku kuminsá nan fiesta 6.30 anochi pa nan lo por presentá tur nan 43 piesanan ku nan tin riba lista pa toka…

 

Tin vrum vrum ku Desèmber lo habri kompletu, pero nos ta na mitar di luna di novèmber i no tin indikashon ku kosnan lo kambia, pues segun mi mihó purba aworakí pa habri bai orario normal konforme pèrmit ku warda pa hasi esaki den desèmber i si algu bai robes, e pueblo lo tin ku pasa fin di desèmber restringí ku ‘toke de keda’…

 

Basta ta e produskhonnan musikal nobo ku ta keda lansa den e dianan aki…

 

Un punto importante ku meresé un solushon rápido pa e sitionan di Horeca por sigui funshoná ta e kestion di e ‘Health App’ i QR code pa bo por drenta e sitionan…

 

Aworakí si bo tuma nota tin masha hopi turista ta bishitando nos isla…

 

E pronóstiko ta ku den luna di desèmber e kantidat di turistanan lo sigui oumentá…

 

Mirando e promoshon ku Ofisina di Turismo ta hasiendo pa nos isla i si bo tuma nota kuantu hende ta biniendo for di Hulanda diariamente, bo ta yega fásil na e konklushon ku nos ta bayendo den e bon direkshon, awó ta kiko un doño di un restorant mester hasi ora ku un turista yega serka dje i e no tin un prueba di bakuna ku ta keda aseptá na Kòrsou? …

 

Mayoria lo aseptá e turista debí ku esaki ta entrada pa nan negoshi, pero e ta enserá mesora ku si bin kontrol lo e risibí un but pa motibu ku ela permití un persona ku no tin QR code drenta su negoshi…

 

Mi ta spera ku lo por tin un solushon rápido pa e situashon aki, paso lo e bira un dolor di kabes pa negoshinan den Horeca, sigur bar, restorant i klupnan nokturno pa aseptá hende ku no tin un QR code konforme eksigensia di Gobièrnu…

 

Nos tei move, bon siman na abo ku ta kuminsá otro siman ku e meta pa sigui produsí pa adelanto di Kòrsou, Huntu nos ta logra!…

 

Te djabièrnè ku Dios ke!..

LAGA UN KOMENTARIO

Please enter your comment!
Please enter your name here