Un bon siman pa tur nos lektornan…

 

E asuntu di aglomerashon ta birando algu ku ta saliendo kompletamente for di man…

 

Ayera Polis tabata man yen ta atendé ku diferente kaso kaminda sea doño di establesimentu no ta tene nan mes na regla òf ta pueblo mes ta aglomerá na sierto sitionan i okashoná situashon ku ta kompletamente for di òrdu…

 

Mi ta spera mirando tur loke ku a sosodé ayera ku lo no bini resistensia di parti di e lokalnan mirando ku sigur na dos diferente sitio e hulandesnan no a sa di komportá nan mes na e manera ku ta spera di nan…

 

Ratu ratu, bo ta haña e impreshon ku sea no tin kunes ku nada òf ta hasi numa i si Polis, MEO ets. bin kontrolá ta hala kita for dje sitio…

 

Tipo di situashon asina’ki tei trese ku lo por implementá medidanan mas stringente …

 

Restorantnan a adaptá na orario di trabou i segun ma komprondé te hasta a kuminsá pone un límite di tempu ku un mesa por keda okupá pa dje forma ei nan por sirbi mas tantu bishitante posibel…

 

Restorantnan ta sigui atraé un públiko grandi, algu ku sigur e sektor aki ta sigui drai sin problema ainda…

 

Kontrol ta e faktor masha importante pa trata na mitigá e kantidat di hende riba otro loke lo yuda tambe pa evitá ku e kantidat di kontagionan ta sigui subi…

 

Farándula aworakí, ku eksepshon di esnan ku por presentá den formashon chikí ta para!…

 

Esaki ta trese kuné ku e sektor ta bolbe sufri, ban spera ku despues di e 10 dianan di ‘Time Out’ ku situashon por drecha un tiki pa sikiera mas músiko tin chèns di por presentá durante di sikiera ‘Happy Hour’…

 

Aworakí ta resta e músikonan nada otro ku kuminsá produsí muzik pendiente pa e sektor por aktivá atrobe pa por kuminsá traha…

 

Ban spera ku e komportashon no trese ku ‘Time Out’ lo bira ‘Lockdown’…

 

Dr. Genser di Aruba, konosí den farándula komo Miguel Genser resientemente a lansa un kansion titulá ‘Speransa’ ku tin un kontenido profundo…

 

Un kansion pa tur esnan ku tin mester di speransa, motivashon, klaridat, positivismo, direkshon i felisidat…

 

Tremendo produkshon ku mester zona na nos radionan lokal pa yuda plama e mensahe positivo aki…

 

Miguel Genser den pasado a produsí diferente éksito musikal ku a zona na tur e islanan ABC…

 

Tin diferente proyekto musikal i di arte ku Prins Bernhard Cultuurfonds ta sostené durante di aña, hopi ta e músiko i artistanan ku ta hasi uso dje oportunidat aki pa produsí nan proyektonan…

 

Promé ku fin di aña nan a presentá un proyekto nobo kaminda artesanonan lokal tambe por a solisitá pa un sosten finansiero pa nan proyekto…

 

Mi ta spera ku nos hendenan mira e oportunidatnan aki komo un chèns pa por kuminsá implementá e idea ku bo tin ta kana rònt kuné i logra bin na remarke pa e sosten ku e organisashon ta duna…

 

Nos tei move, bon siman! Ban kuida!!!

5 COMMENTS

LAGA UN KOMENTARIO

Please enter your comment!
Please enter your name here