Un felis djárason na tur nos lektornan…

Awe nochi ‘Junior All Star Orchestra’ tin nan konsierto ‘Un regalo di Pasku’ na Lanthùis Brakkeput Mei Mei…

Entrada pa e konsierto ta grátis i ta kuminsá pa 7.30’or di anochi i ta terminá 10’or…

Mayornan ku tin yunan ku talento musikal asistí na e konsierto aki pa dje forma ei bo yu mira otro hóben presentá i dun’é un empuhe pa e tambe desaroyá su talentonan…

Ma komprondé ku awe nochi e hóbennan ku ta siguiendo formashon musikal di instrumèntnan di supla tambe lo presentá ku e orkesta…

Esaki sigur ta un logro grandi pa Instituto pa Formashon Musikal i pa Akademia di Músika ‘Errol “El Toro” Colina’…

Ma papia ku Feco Gomes ayera riba e desaroyonan relashoná ku Festival di Tumba…

Feco ta kombensí ku lo e ta kla pa dia 8 di desèmber e anunsiá Festival di Tumba 2018 ku su brandingpartners…

Ma tuma nota dje komunikado di Minister di Hustisia relashoná ku otorgamentu di pèrmit pa artistanan internashonal presentá na Kòrsou durante dje temporada di desèmber pa djárason di shinishi…

Segun mi e splikashon ku a keda duná ta lat, lat pasó promotornan ta traha ku algun luna di antisipashon …

E idea pa tòg tin eksepshon ta bon, pero esaki mester a keda splika fo’i delantá pa dje forma ei evitá ku promotornan, sigur esnan di ‘Taste of Music’ mester a para nan evento…

Mi no sa kuantu promotornan mas a disidí di distansiá nan mes di organisá nan evento…

Fo’i 2015 ma indiká ku mi no ta mira e motibu pa prohibí e presentashon di artistanan internashonal durante dje periodo…

Si ta pa protekshon di nos artistanan lokal, e desishon no ta yuda ku nada…

Ora bo prohibí, bo ta stroba artistanan lokal tambe di haña chèns pa presentá den pre show di un show grandi…

Nos ekonomia, sigur tur e empresanan ku ta keda kontratá durante di produkshon di un evento ku artista internashonal sea konsierto òf kualke presentashon den un fiesta ta keda sin haña trabou…

Ora ta yega na idea pa bin ku un artíkulo manera artíkulo 47 di e lei di L.O.O., bo mester evaluá ki influensia esaki ta bai tin riba e mundu komersial i tambe si e ta stroba bo artistanan lokal di presentá…

Hopi ta esnan ku ta yega na entrada basa riba e ‘spin off’ ekonómiko di kualke konsierto i òf presentashon di un artista internashonal na Kòrsou…

Palabra ta na Parlamento di Kòrsou pa bin ku un proposishon di lei pa ‘skrap’ artíkulo 47 òf hasi un adaptashon na esaki…

Ma tende ku tin hende no a keda kontentu ku e echo ku ‘Mister Oreo’ a laga e fiesta di pueblo di e koperativa para…

Di otro banda, awor ta resultá ku hendenan ta loko pa bai e fiesta di dia 8 di desèmber kaminda OREO, ERA i Doble ta toka…

Mi tei move, djabièrnè mi tei bèk…

LAGA UN KOMENTARIO

Please enter your comment!
Please enter your name here