Un felis djárason pa tur nos lektornan…
Djaluna atardi mi a hasi mi promé bishita na ‘Vanilla’…
Ma keda impreshoná pa e manera ku a dekorá e lugá, pabien na Archel Calister i su tim pa a ‘level up’ loke promé tabata konosí komo ‘Bananas’…
Si wanta e konsepto ku nan ta drai kuné mi ta sigur ku Vanilla lo tei pa ratu…
Den tur loke tin, mester tin un lugá ku ta apart i ‘Classy’…
Hom, mi no tabata sa ku Dwight de Windt ta kantante tambe…
Ayera nochi Dwight a presentá riba Freewinds durante dje konsierto di Pasku huntu ku Toni Worrell…
Hopi konsierto den ambiente di Pasku, meskos ta e kaso ku fiestanan pa fin di aña…
Ayera nochi ma kombersá ku un persona ku ta hopi yegá na organisashon di fiesta i aktividatnan di fin di aña i nos tur dos a konkluí ku tin fiesta ku lo bai konta ku presensia di forlestu…
Ayera ma topa ku Feco den tráfiko…
E so tabata kore ta hari den outo…
Ora el a para, ma haña chèns di kumind’é i ma bis’é ku e ta blo ta hari…
‘Luis mi ta kontentu, brandingpartnernan a kuminsá ta konfirmá nan partisipashon na Festival di Tumba 2018’…
Aworakí ta pendiente pa kaba di risibí konfirmashon di algun brandingpartner mas pa dje forma ei AMAK por anunsiá ‘Festival di Tumba 2018’ ku tur detaye…
Ma tuma nota di e desishon negativo ku a kai pa un banda venezolano ku tin kustumber di bin Kòrsou pa hasi presentashonnan privá den luna di desèmber…
E banda segun m’a komprondé tabatin sigur 10 presentashon…
Awor a prohibí nan presentashon, pero e loke ku no ta wòrdu evaluá ora ta tuma desishon ta kuantu hende mas ta sufri ora e desishon aki keda tumá…
E apartamentu ku ta hür pa e músikonan keda…
E kompania di zonido ku a pèrdè 10 mil florin, debí na e desishon…
E kompania di generator ku a pèrdè 3 mil florin…
I asina por sigui menshoná mas punto ku ta pone ku empresanan lokal ta sufri ku desishonnan ku ta wòrdu tumá…
M’a komprondé ku sigur un dje establesimentunan ku a kontratá e grupo pa presentá a tuma e desishon ku nan no ta organisá niun otro evento den nan lugá…
Esaki tambe ta trese pèrdida den sierto sentido pa e empresa…
M’a komprondé ku tin 1 dj lokal tambe ku a pèrdè sigur algun presentashon huntu ku e banda…
Awor e punto mas prinsipal di henter e kaso aki…
‘Louie Louie’ a komprondé ku e promotor ku kier a trese e grupo Kòrsou no a risibí un kontesta por eskrito dor di Gobièrnu, e tambe a bisé ku boka ku e banda no por bini…
Ora aña bòltu mi ta mira algun promotor ku kaso kontra di Gobièrnu debí na e fayo aki…
Mi yama ‘sinta mira’…
‘Louie Louie’ tei move, nos tei bèk Djabièrnè ku Dios ke !…
