LOUIE LOUIE

Siman a yega su mitar awe…

 Gigo Martinez a traha un cover dje kansion di Guus Meewis ‘Het is een nacht’…

 E piesa ta zona bon i esaki manera mi ta mira ta dirigí riba e públiko ku tur djaweps ta bai presensiá su presentashon na BAR 27 riba de Ruyterkade na Pietermaai…

 No ta su promé kansion na Ulandes, aña pasá el a produsí ‘Niet Verliefd’ ku a resultá un éksito pe…

 Ta keda komo diskushon ki influensia AMAK lo por tin pa por logra ku artistanan por haña un ‘luf’ di Gobièrnu pa loke ta trata e gastunan sosial ku nan tin di paga …

 Ya pa vários aña e organisashon a yega di aserka Gobièrnu pa wak e posibilidat pa entre otro baha akseins riba instrumènt, pero tambe pa tin un trato preferensial serka entidatnan manera ofisina di Ontvanger pa loke ta trata pago di belasting…

 E echo ku ta konsiderá kada banda komo un empresa privá ta pone ku no fásilmente bo ta logra pa risibí kondishonnan faborabel …

 Nos ta sklama ku ‘night life’ ta hopi ketu na Kòrsou, pero un biaha mas mester evaluá pa por duna un kontesta riba e ponensia…

 Podisé pa abo ‘night life’ ta presentashon di bandanan lokal, pero no lubidá ku tin diferente entertainment band i òf artistanan ku ta presentá na diferente sentro di dibertishon rònt Kòrsou…

 Te hasta presentashon di dj mester ser konsiderá komo artista…

 Nan ta artista i ta presentá ku regularidat durante di fin di siman, pues e persepshon ku no tin masha moveshon por ta den fiestanan popular, pero ku tin artistanan ta presentando durante henter siman ta un echo…

 Ban wak kiko por ser lográ pa ta un insentivo pa nos artistanan lokal…

 Mañan nos ta pendiente pa asistí na un rueda di prensa na Buena Vista kaminda e organisashon lo bai divulgá plannan pa duna homenahe na un tim di sòftbòl di e bario i tambe na un famia farandulero …

Tin algun bachatero ku ta pendiente pa bin Kòrsou…

 Ayera ma komprondé ku tin diferente promotor ku tin artistanan bachatero kontratá i ta hasiendo e trámite aworakí pa risibí nan pèrmit pa e presentashon…

 Entre nan tin un nòmber grandi ku a ser menshoná…

 Mi ta laga e promotor kaba di konkretisá su pèrmit pa dje forma ei e por anunsiá e presentashon di e artista trankil…

 Papiando di bachata, Romeo Santos a lòs ‘Imitadora’ i kita ‘Despacito’ for di # 1 riba Billboard ‘Latin Airplay’…

 Bo ta mira kuantu influensia Romeo Santos tin riba e merkado musikal Latino Amerikano…

 E siman aki e ta lansa su albùm nobo …

 Ma tuma nota ku O’Vega ta ripití Caracasbaai komo sitio pa nan ‘Beach Summer Tour’ djadumingu awó, siman pasá a bai bon i djadumingu awor tin ripitishon…

 E siman aki nan ta toka huntu ku dj Black…

 Nos tei move, djabièrnè nos tei bèk ku otro edishon di ‘Louie Louie’…

 

 

 

SHARE

LEAVE A REPLY