Un potrèt emití pa presidensia di Brasil ta mustra Presidente Luiz Inacio Lula da Silva huntu ku eks-presidente argentino Cristina Fernandez de Kirchner durante un bishita ayera na Buenos Aires.
BUENOS AIRES (AFP).- Presidente di Brasil, Luiz Inácio Lula da Silva, a deseá e eks-mandatario argentino Cristina Kirchner “forsa pa sigui lucha”. El a hasi esei durante di un bishita na kas dje eks-mandatario na Buenos Aires, kaminda e ta kumpli ku ‘huisarrest’ den un sentensia pa korupshon.
Lula ayera a bishitá Kirchner na final di su partisipashon den e kumbre di Mercosur den e kapital argentino.
“Awe m’a bishitá e kompañera i eks presidente Cristina Kirchner i a dese’é hopi forsa pa sigui lucha ku e mesun firmesa ku el a demostrá durante di su trayektoria di bida i den polítika”, segun Lula a skirbi riba X.
Di su parti, Kirchner (72) a bisa ku e bishita “tabata muchu mas ku un gesto personal: tabata un akto polítiko di solidaridat”. El a bisa mas aleu ku Lula tambe a keda será, “nan a purba na tapa su boka”, pero “el a regresá ku voto dje pueblo brasilero”.
Kirchner, dos biaha presidente (2007-2015) i un vise presidensia (2019-2023), ta liderá Partido Justicialista i ta e prinsipal opositor dje gobièrnu dje mandatario ultraliberal Javier Milei.
Lula a drenta e kas di Kirchner den e bario Constitución meimei di desena di hende ku tabata para warda riba dje i despues di kasi un ora di bishita el a bai sin hasi deklarashon.
Desena di hende tabata warda pa mira Lula i Kirchner huntu, pero esei no a tuma lugá.
E propio presidente di Brasil tabata prezu entre 2018 i 2019 ku un kondena pa korupshon, pero ku despues a keda anulá dor di Korte Supremo dje pais.
Na e okashon ei el a risibí bishita dje eks-presidente argentino Alberto Fernandez (2019-2023), ku e tempu ei tabata kandidato huntu ku Kirchner.
